საზოგადოებრივი მაუწყებლის სამეურვეო საბჭო გენერალური დირექტორობის ხუთივე კანდიდატს გაესაუბრა. მათ შორის ბოლო ნინო ზაუტაშვილი იყო.

დირექტორობის კანდიდატმა ხედვის გაცნობის დიდი ნაწილი მაუწყებლის მიმართ ნდობის გაზრდას დაუთმო. მისი თქმით, მას, დირექტორობის კანდიდატებს შორის, საზოგადოებისგან ყველაზე დიდი ნდობა აქვს.

„საზოგადოებრივი მაუწყებელი არის მაშველი რგოლი, მათ [მაყურებელს] უნდა ეიმედებოდეთ ის ადამიანები, ვინც მუშაობენ. ნდობას კანონები და რეგულაციები ვერ აკეთებენ, ნდობას აკეთებენ ადამიანები. ერთ-ერთი ადამიანი თუ ერთადერთი არა, ბოდიში ყველა კანდიდატთან, ვარ მე. ნდობა უკვე მოპოვებული მაქვს. ამიტომ, მინდა ჩემი ნდობის ეს მარგალიტები გადმოვდო საზოგადოებრივი მაუწყებლის ბალანსზე. ეს ავტომატურად ნიშნავს, რომ საზოგადოებრივ მაუწყებელს ეყოლება მაყურებელი,“ - თქვა ზაუტაშვილმა საზოგადოებრივი მაუწყებლის ნდობის გაზრდის ერთ-ერთ გზად.

ზაუტაშვილი ნდობის საკითხს გასაუბრების ბოლოსაც შეეხო, როცა მას სამეურვეო საბჭოს წევრმა ჰკითხა - მენეჯერი ყველა თანამშრომელს უნდა უყვარდეს თუ არა. დირექტორობის კანდიდატს მიაჩნია, რომ შესაძლოა დირექტორი ყველა თანამშრომელს არ უყვარდეს, თუმცა მას უნდა ენდობოდნენ.

„შეიძლება შენ არ იყო პირველი, მაგრამ შენთან უდნა გადაამოწმონ. უნდა იცოდნენ, რომ რაც გავა საზოგადოებრივ მაუწყებელზე, ის მოხდა. ამის მიღწევა შეიძლება ადამიანებით. ადამიანი არის ყველაზე სანდო. მე მიმაჩნია, რომ ამ მიმართულებით ვარ ყველაზე კარგი კანდიდატი“, - აღნიშნა მან.

მისივე თქმით, დირექტორი თავისუფალი ადამიანი უნდა იყოს, რომელიც თანამშრომლებისგან იდეებს მიიღებს და შეუქმნის მათ პირობებს მუშაობისთვის.

„არ შეიძლება მესამე სართული პერიმეტრით მართავდე ტელევიზიას, შენ უნდა იცოდე რამდენი აქვს დეიდა ნათელას ხელფასი, რომელიც უზარმაზარ სტუდიას ალაგებს“, - დასძინა მან.

გარდა ნდობისა, ზაუტაშვილის ხედვით, აუცილებელია ტელევიზიის რადიოს და ვებგვერდის თანამშრომლების ხელფასების გადახედვა, მაუწყებლობის გავრცელების უზრუნველყოფა, საეთერო ბადის დახვეწა, ტექნიკური გადაიარაღება და რეკლამის შესახებ კანონში ცვლილებების შეტანა. თუმცა, დირექტორად არჩევის შემთხვევაში, პირველ რიგში გავრცელების არეალის გაზრდასა და ტექნიკურ გადაიარაღებაზე მუშაობას გეგმავს.

ნინო ზაუტაშვილმა 2015-2016 წელს შეუსრულებელ სამაუწყებლო პრიორიტეტების შეუსრულებლობაზეც ისაუბრა. მისი თქმით, მაუწყებელში არ არსებობდა პრიორიტეტების შესრულების ნება.

ზაუტაშვილი 1986-2002 წლებში სახელმწიფო ტელევიზიაში (ამდროინდელი საზოგადოებრივი მაუწყებელი) მუშაობდა სხვადასხვა პოზიციაზე, 2002-2009 წლებში ის იყო ტელეკომპანია იმედის შემეცნებითი და გასართობი გადაცემების მთავარი პროდიუსერი და წამყვანი. ზაუტაშვილმა 2009 წელს მუშაობა ისევ საზოგადოებრივ მაუწყებელში გააგრძელა, გადაცემა სამოთხის ვაშლების წამყვანის პოზიციაზე, სადაც 2014 წლამდე იმუშავა. 2013 წლის სექტემბრიდან ის არის გადაცემა რეალური სივრცის ავტორი და წამყვანი.

დღეს დირექტორობის ხუთივე კანდიდატს შორის დებატებია დაგეგმილი. ხვალ კი სამეურვეო საბჭო ეცდება გენერალური დირექტორი აირჩიოს.