სვანეთში, მესტიის მუნიციპალიტეტში, სოფელ დიზის მიმდებარე ტყეში ხანძარია. საგანგებო სიტუაციების სამსახურის ინფორმაციით, ხანძრის ქრობის სამუშაოებში ვერტმფრენი ჩაერთო.

"ადგილზე უკვე მისულია მეხანძრე-მაშველების რამდენიმე ეკიპაჟი და ინდივიდუალური აღჭურვილობით აქრობენ ცეცხლს. ხანძრის კერა მთის ფერდობზეა. რთული რელიეფის გამო, კერასთან სახანძრო-სამაშველო ავტოტექნიკის მიყვანა ვერ ხერხდება, ამიტომ ხანძრის ქრობის სამუშაოებში ჩართულია შინაგან საქმეთა სამინისტროს სასაზღვრო პოლიციის ვერტმფრენი", — აცხადებენ უწყებაში.

მათივე ინფორმაციით, ამ დროისთვის, ცეცხლი ტყის ქვედა საფარს უკიდია.