ჯანდაცვის მინისტრის, ეკატერინე ტიკარაძის განცხადებით, კოვიდ-პანდემიის მართვაში ჩართული ექიმები ხელფასს 50%-იანი დანამატით აიღებენ. ამის შესახებ განცხადება მან საკოორდინაციო საბჭოს დასრულების შემდეგ გამართულ ბრიფინგზე გააკეთა.

"ექიმებს, რომლებიც ჩართულნი არიან კოვიდ-კლინიკებში, მათი სამუშაო ანაზღაურების შესახებ გადაწყვეტილების მიხედვით, დეტალურად მოხდა გათვლა იმ სახელფასო ფონდისა და იმ ექიმებისა, რომლებიც არიან ჩართულები და მოხდა მათი დაყოფა ჯგუფებად და გუნდებად. ჩვენ გავთვალეთ 70 რეანიმაციულ პოსტზე ექიმ-რეანიმატოლოგ, ექიმ, უმცროს ექიმების და ექთნების სახელფასო ანაზღაურება და, ასევე, ინფექციონისტების, რომლებიც აქტიურად არიან ჩართულნი ამ პროცესში და ის თერაპევტები და ექთნები, რომლებიც ამ პროფილს ფარავენ. ყველა ჩართულ ექიმს ექნება დამატებით 50%-იანი დანამატი იმ ხელფასზე, რომელიც არის საბაზრო ღირებულება საათობრივ ანაზღაურებაში", — განაცხადა ტიკარაძემ.

მისივე თქმით, აღნიშნულის თაობაზე დადგენილება დღეს გამოიცემა.