ევროპული საქართველოს საარჩევნო შტაბის ხელმძღავენლი სერგი კაპანაძე, მარეგულირებელ კომისიას მიმართავს, რომ დროულად გააკეთონ განმარტება რეგულაციასთან დაკავშირებით, რათა ტელევიზიებს მიეცეთ საშუალება გაუშვან ევროპული საქართველოს კლიპი თავიანთ ეთერებში.

კაპანაძის თქმით, ეს არის სიტყვისა და გამოხატვის თავისუფლების შეზღუდვა და კლიპი, სადაც ნეგატიურ კონტექსტში არიან ნახსენები ბიძინა ივანიშვილი და მიხეილ სააკაშვილი, იზღუდება ტელევიზიების მიერ კონკრეტული რეგულაციის გამო, რომელიც არ არის სრულად დასაბუთებული.

"ევროპულმა საქართველომ რამდენიმე დღის წინაც გააკეთა განცხადება, რომ რამდენიმე მედიასაშუალება, მთავარი და იმედი, არ უშვებენ ეთერში სარეკლამო კლიპს, რომელიც ევროპულმა საქართველომ მოამზადა, სრულიად გაუგებარი მიზეზებით და გასაგებია, რომ ამ კლიპის გაშვება არ აწყობთ არცერთ პოლიტიკურ ძალას, რომელსაც ეს კლიპი ეხება, მაგრამ ასევე გასაგებია, რომ ეს არის სიტყვის და გამოხატვის თავისუფლების შეზღუდვა მარეგულირებელი კომისიის მხრიდან და იმ რეგულაციების მხრიდან, რომელსაც მარეგულირებელი კომისია ეფარება ხოლმე და აჯარიმებს სხვადასხვა ტელევიზიებს.

გუშინ, ნიკა გვარამიამ მიმართა მარეგულირებელს, რომ დროულად მისცეს განმარტება ამ საკითხთან დაკავშირებით. ჩვენ ვიმეორებთ იმ მიმართვას, რომელიც გვქონდა 2 დღის წინ, რომ დროულად მიეცეს ნება ან განიმარტოს ის მუხლი, რომელიც შეიძლება იყოს აღქმული განსხვავებულად, რომ ის მუხლი განიმარტოს გამოხატვის თავისუფლების სასარგებლოდ და ევროპულ საქართველოს მიეცეს საშუალება, რომ კლიპი, რომელიც ეხება ერთი მხრივ, ბიძინა ივანიშვილს, როგორც ამ ქვეყნის ჭაობში დატოვების მსურველ პოლიტიკურ ძალას და მეორე მხრივ, მიხეილ სააკაშვილს, რომელსაც არ ძალუძს ასევე ცვლილებები და არის საუბარი ჩვენს გეგმებზე, თუ წინ როგორ წავიყვანოთ ქვეყანა, რომ ეს კლიპი გაუშვან უახლოეს მომავალში.

ჩვენთვის მნიშვნელოვანია, რომ ჩვენი წინასაარჩევნო გზავნილები ყველა მედია საშუალების გამოყენებით მივიდეს საზოგადოებამდე. ჩვენ, რა თქმა უნდა, ვიყენებთ სოციალურ მედიასაც, სხვა საშუალებებსაც, მაგრამ, ჩვენი მოსაზრებების გაშვება ტელევიზიით არის მნიშვნელოვანი და ამის შეზღუდვა არ არის კონსტიტუციური და კანონიერი.

ამიტომ, მოვუწოდებ მარეგულირებელ კომისიას, რომ დროულად, დაყოვნების გარეშე, მისცეს საშუალება ტელეკომპანიებს, რომ ჩვენი კლიპი გავიდეს და ხალმა ნახოს", — აცხადებს კაპანაძე.