ევროპული საქართველოს ერთ-ერთი ლიდერი, ტყიბულის, თერჯოლის, ზესტაფონისა და ბაღდათის მაჟორიტარობის კანდიდატი, გიგი წერეთელი, მარნეულში მომხდარ ინციდენტს ეხმაურება. მისი თქმით, ამგვარი ფაქტები მძიმე დარტყამს აყენებს საარჩევნო პროცესს და საბოლოოდ მნიშვნელოვან გავლენას იქონიებს საარჩევნო პროცესის შეფასებაზე საერთაშორისო თანამეგობრობის მხრიდან.

"მარნეულში განხორციელებული მორიგი ძალადობა, ამჯერად უკვე ჟურნალისტებზე, არის ერთი მხრივ სრულიად მიუღებელი და მეორემხრივ ძალიან მძიმე დარტყმას აყენებს საარჩევნო პროცესს. ხელისუფლების მხრიდან ვითარების რადიკალიზაცია, ყველაფრის ოპონეტებისათვის გადაბრალება და შიშის დანერგვა ამომრჩევლებში მხოლოდ და მხოლოდ ნეგატიურ შედეგს გამოიწვევს და ამავდროულად ცუდ როლს ითამაშებს საქართველოს საპარლამენტო არჩევნების შეფასებაზე საერთაშორისო თანამეგობრობის მხრიდან" — ამბობს წერეთელი.

წერეთელმა აღნიშნა, რომ სწორედ მსგავსი ფაქტების დაუსჯელობამ და შერჩევითმა დამოკიდებულებამ წაახალისა დაპირისპირება და ძალადობა.

"ხელისუფლების წარმომადგენლების განცხადებები არჩევნების მაღალ სტანდარტზე და დემოკრატიულობაზე უნდა იყოს გამაგრებული კონკრეტულ მოქმედებებით და ამგვარი გარემოს შექმნა ხელისუფლების პასუხისმგებლობაა, ამავდროულად, მნიშვნელოვანია, რომ არცერთი მოძალადე არ დარჩეს დაუსჯელი, რადგან სწორედ წინა პერიოდში მსგავსი ფაქტების მიმართ დაუსჯელობამ, შერჩევითმა დამოკიდებულებამ, წაახალისა დაპირისპირება და ძალადობა", — განაცხადა წერეთელმა.