ევროპული საქართველოს მაჟორიტარობის კანდიდატი ზუგდიდში, გიგი უგულავა ზუგდიდის რაიონში, სოფელ რუხის ციხეში მხარდამჭერებს შეხვდა.

შეხვედრაზე მოსახლეობას მიმართა პარტიის მაჟორიტარობის კანდიდატმა ბათუმში, არმაზ ახვლედიანმა.

მისი თქმით, ივანიშვილის პოლიტიკა არის "უღირსი, არაკომპეტენტური და ქვეყნისათვის მავნებლური". ახვლედიანმა აღნიშნა, რომ ამგვარი პოლიტიკა უნდა ჩანაცვლდეს და ის უნდა ჩაანაცვლოს ისეთმა კომპეტენტურმა პოლიტიკოსებმა, როგორიც გიგი უგულავაა, რომელსაც შეუძლია მოუტანოს როგორც ზუგდიდს, ისე მთლიან საქართველოს გარდამტეხი ცვლილებები.

"5 წლის ასაკში მამაჩემი ბათუმში ყოველდღე მიმეორებდა 2-3 ფრაზას. მათ შორის 1 იყო ასეთი — "ქართველისთვის ყველაზე დიდი მეგობარი, ძმა, არის აფხაზი". ახლა აქ, თქვენთან ყოფნისას ვგრძნობ, რომ ყველაზე უფრო ახლოს ვარ ჩემს სამშობლოსთან, აფხაზეთთან. აფხაზეთის გარეშე მე ვერ ვიქნები ბათუმელი. ფრთა მოტეხილი აქვს ჩვენს საქართველოს.

მე მინდა ჯვართამაღლების დღესასწაული მოგილოცოთ და გითხრათ, რომ ჯვრის ტარება საკუთარ თავზე გამარჯვებას ნიშნავს. მე მჯერა, რომ არსებობს შერიგების უზენაესი კულტურა, შერიგების კულტურა, რომელიც ყველაფრის მიუხედავად, კვლავ შეგვარიგებს. აქედან მინდა ვუთხრა ჩვენს დებს და ძმებს, აფხაზეთში დარჩენილებს — ჩვენ ისინი ძალიან გვიყვარს, ყველა წყენის, ყველა ტკივილის მიუხედავად, რადგან ამ წყენაზე მეტია ჩვენი წარსული და რაც მთავარია, ჩვენი მომავალი.

მე მინდა ყველას გითხრათ მადლობა, რომ შეიკრიბეთ ამ დღეს, როდესაც ჩვენი საამაყო ეროვნული დროშა დაშვებულია, რადგან ეს დროშა აღარ დაეშვას არასდროს; რომ ჩვენი დროშა იყოს ყოველთვის ამაყად მოფრიალე. ამას სჭირდება სამართლიანი საქართველო, დემოკრატიული საქართველო. რეალური თვითმმართველობა აქ და ყველგან ქვეყანაში. ამას სჭირდება წესიერი, გამართული პარლამენტი, რომელიც ვერ იქნება ასეთი, თუ იქ არ შევიდა თუნდაც რაღაც ნაწილი წესიერი, გამართული, საკუთარ და სხვათა შეცდომებზე მოფიქრალი ადამიანებისა.

მე მიხარია, რომ ზუგდიდელებს ახლა უწევთ არჩევანის გაკეთება, სწორედ ასეთი ადამიანის სასარგებლოდ. გიგი უგულავა, ისევე როგორც საქართველოს პოლიტიკურ სარბიელზე მყოფი ნებისმიერი სხვა, დიდი მასშტაბური პოლიტიკოსი, იმით გამოირჩევა, რომ საკუთარ და სხვათა შეცდომებზე ფიქრობს, აანალიზებს და ხვდება, რომ ამ შეცდომების გაანალიზების გარეშე შეუძლებელია გამარჯვება. როცა ამ გამარჯვებას საფუძვლად უდევს ნებისმიერი ადამიანის, ყველაზე უღირსი ოპონენტის ადამიანური ღირსების გათვალისწინებაც, ეს ნიშნავს, რომ შენ აუცილებლად გაიმარჯვებ; გაიმარჯვებ იმიტომ, რომ ამ გამარჯვებას ასულდგმულებს უმთავრესი რამ — ჩვენი ქვეყნის, ჩვენი ხალხის ნება. ჩვენი ხალხის ნება კი ასეთია — უნდა დასრულდეს ანომალიური ექსპერიმენტების ეპოქა საქართველოში; უნდა დასრულდეს ივანიშვილიზმი, რაც თავისთავად ანომალიაა, მაგრამ ის აღარასდროს არ უნდა განმეორდეს.

მე იმიტომ ვუჭერ მხარს გიგი უგულავას მსგავს პოლიტიკოსებს, რომ დასრულდეს დღეს ივანიშვილის მმართველობა, მაგრამ აღარასდროს აღარ გამეორდეს ივანიშვილიზმი. ივანიშვილიზმი, როგორც ქვეყნის მოხრჩობის, ადამიანის უფლებების დარღვევის, აფხაზეთზე არ ფიქრის და აქ კრემლის ინტერესების განხორციელების სიმბოლო. ამიტომაც, ძვირფასო მეგობრებო, მე მოგიწოდებთ, რომ არჩევანი გავაკეთოთ სინდისის ხმის მიხედვით. ეს არჩევანი იქნება, რა თქმა უნდა, სამართლიანი საქართველოს, სამართლიანი ზუგდიდის, აქ სამართლიანი მმართველობის, ადამიანზე ორიენტირებული. და არა ისეთი, რომელიც გვაქვს წლიდან წლამდე, როცა ადამიანი უყურებს პოლიტიკურ რეკლამას და ხვდება, რომ იტყუებიან, ცრუობენ. ეს არის ფარსი და ამ ფარსიდან გამოსვლა შესაძლებელია მხოლოდ იმ პოლიტიკოსებთან ერთად, ვინც ერთი მხრივ, კარგად იცის, რას ნიშნავს შეცდომა და ამ შეცდომის გათვალისწინება და ვინც ხვდება, რომ საქართველო აწეული დროშა იქნება მხოლოდ მაშინ, როდესაც იგი გაიმარჯვებს საკუთარ თავზე და ეყოლება გამარჯვებული, ადამიანზე ორიენტირებული ხელისუფლება.

მე გთავაზობთ, გავაკეთოთ არჩევანი სწორედ ასეთი გუნდის სასარგებლოდ და ერთი საკმაოდ გამოცდილი პოლიტიკოსის სასარგებლოდ, რომელმაც ივანიშვილის ათასგვარი ხრიკებისგან მოახერხა ის, რომ არ გატყდა და დღესაც მედგრად სთავაზობს ზუგდიდელებს არჩევანს უკეთესი საქართველოს სასარგებლოდ. მე მინდა წარმოგიდგინოთ გიგი უგულავა და ვუსურვო მას საქართველოსთან, ზუგდიდთან ერთად დიდი გამარჯვება", — განაცხადა არმაზ ახვლედიანი.