მართალია, Friends-ის ერთგული გულშემატკივრები უკვე დიდი ხანია უშედეგოდ ელოდებიან HBO Max-ის მიერ დაანონსებულ სპეციალურ ეპიზოდს, თუმცა სულ ცოტა ხნის წინ ემის დაჯილდოებაზე ამ საკულტო შოუს მსახიობებმა მოულოდნელი სიურპრიზით უამრავი მაყურებლის გახარება მაინც შეძლეს.

რამდენიმე საათის წინ ემის 2020 წლის დაჯილდოება დისტანციურად გაიმართა, რა დროსაც წამყვანი ჯიმი კიმელი სხვადასხვა ცნობილ სახეებს ვირტუალურად ერთვებოდა მათ სახლებში და ისე მიჰყავდა ცერემონია.

აბა, გამოიცანით, ჯენიფერ ენისტონის ჩართვისას კიდევ ვინ გამოჩნდა კამერაში?

რაღა თქმა უნდა, კორტნი კოქსი და ლიზა კუდროუ.

ფოტო: ABC

"უი, კორტნი კოქსიც აქ ყოფილა!" — შეიცხადა ჯიმი კიმელმა, რაზეც კორტნიმ ასე მიუგო: "რა თქმა უნდა, აქ ვარ, ჩვენ ხომ ერთად ვცხოვრობთ."

"ჰო, 1994 წლიდან ერთ ბინაში ვცხოვრობთ", — დაამატა ჯენიფერ ენისტონმა.

სრული ვიდეო შეგიძლიათ ნახოთ აქ:

Friends-ის პრემიერა 1994 წელს შედგა და 10 სეზონის შემდეგ 2004 წელს დასრულდა. მას შემდეგ ამ საკულტო სიტკომის მსახიობების ერთად ხილვა არც ისე ხშირი მოვლენაა, შესაბამისად, ემის დაჯილდოების ეს სიურპრიზი განსაკუთრებით ძვირფასია ერთგული ფანებისთვის.

შეგახსენებთ, რომ დაგეგმილია ამ სატელევიზიო შოუს ახალი, უცნობი სცენარის მქონე პროექტის გადაღება, შესაბამისად არა მხოლოდ სამ მათგანს, არამედ მალე ყველა მეგობარს კვლავ ერთად ვიხილავთ ეკრანზე.