ნაციონალური მოძრაობის მაჟორიტარობის კანდიდატის, ხატია დეკანოიძის განცხადებით, მას და მის შვილს კრიმინალური პოლიციის თანამშრომლები უთვალთვალებენ. ამის შესახებ მან სპეციალურად გამართულ ბრიფინგზე განაცხადა.

"მიმდინარე წლის 17 სექტემბერს, კოსტავას გამზირზე და ყაზბეგის გამზირზე ჩემს შვილს სურათებს უღებდნენ და უთვალთვალებდნენ შავი მანქანიდან, რომლის ნომერიც გვაქვს. ჩემმა შვილმა და მისმა მეგობრებმა მოასწრეს ამ მანქანის დაფიქსირება. რამდენიმედღიანი კვლევის შედეგად ჩვენ ამოვაგდეთ, რომ ეს მანქანა ეკუთვნის კრიმინალური პოლიციის თანამშრომელს, პეტრიაშვილს, რომელიც მუშაობს გლდანის პირველ განყოფილებაში", — განაცხადა დეკანოიძემ.

მისი თქმით, "ამ ბინძური მეთოდებით" და "რეპრესიული მართლმსაჯულების სისტემის გამოყენებით" ხელისუფლება პოლიტიკური ოპონენტების დევნას ახდენს. იგი შინაგან საქმეთა სამინისტროს მიმართავს, შეწყვიტონ ეს ზეწოლა და მოუწოდებს პროკურატურას გამოიძიონ აღნიშნული საქმე.