გირჩის ლიდერის, ზურაბ ჯაფარიძის თქმით, მას არც სააკაშვილის და არც სხვა პოლიტიკური ლიდერის სჯერა, რომელთანაც ხშირი პრაქტიკული კომუნიკაცია აქვს. ამის შესახებ მან ტელეკომპანია პირველთან მიცემულ ინტერვიუში განაცხადა.

"მე არც სააკაშვილს ვენდობი, არც ერთ სხვა პოლიტიკურ ლიდერს არ ვენდობი, რომელთანაც ყოველდღიური კომუნიკაცია მაქვს, არავის ნდობა არ მაქვს. რისიც მჯერა არის ის, რომ ისეთი სისტემა უნდა შეიქმნას, რომ არც ერთი ლიდერის ხელში არ მოხდეს ძალის კონცენტრირება. გათვლა გავაკეთოთ არა იმისკენ, რომ კარგი ადამიანი ვეძებოთ, არამედ იმისკენ, რომ ყველაზე საზიზღარმა ადამიანებმაც კი ვერ შეძლონ ძალაუფლების მოხვეჭა", — განაცხადა ჯაფარიძემ.

ნაციონალურმა მოძრაობამ და ძალა ერთობაშიამ ყოფილი პრეზიდენტი, მიხეილ სააკაშვილი პრემიერმინისტრობის კანდიდატად წარადგინეს. როგორც პარტიის თავმჯდომარემ, გრიგოლ ვაშაძემ თქვა, გადაწყვეტილება მათ ერთობლივად მიიღეს.

დღეს კი მიხეილ სააკაშვილმა მორიგი წინასაარჩევნო ვიდეომიმართვა გაავრცელა, რომელშიც დაპირებებიც გააჯღერა. ტრადიციულად, სააკაშვილმა საქართველოს მონატრებაზე ისაუბრა და დაპირდა ამომრჩეველს ემიგრანტების ქვეყანაში დაბრუნებას, განათლებისა და ჯანდაცვის სისტემის ხარისხის გამოსწორებას და მდიდარი ქვეყნის შექმნას დაპირდა.