ე.წ. პრინციპული მაჟორიტარი კახა ოქრიაშვილი, რომელმაც საპარლამენტო უმრავლესობის სახელით პროპორციული საარჩევნო სისტემის კანონპროექტი ჩააგდო, აცხადებს, რომ ქართული ოცნებამ ის გააგდო, თანაც "პრინციპული პოზიციის" გამო.

"2020 წლის არჩევნებს რაც შეეხება, მე არ წავსულვარ ქართული ოცნებიდან. ჩემი პრინციპული პოზიციის გამო ქართულმა ოცნებამ განმდევნა. [...]

მე ვიქნები ოპოზიციაში. მე ისეთი ოპონირება შემიძლია, მართლა ღირებული ოპონენტი ვარ. ოცნებაშიც შიდა ოპონირების რეჟიმში ვიყავი. მე ყოველთვის განსხვავებული აზრის ადამიანი ვიყავი, ნაციონალური მოძრაობის დროსაც და ქართული ოცნების დროსაც. თუ ვინმეს ეს არ მოსწონს, ეგ მათი პრობლემაა", — განაცხადა ოქრიაშვილმა TV პირველზე.

საპარლამენტო არჩევნებზე ნაციონალური მოძრაობა და კახა ოქრიაშვილის პარტია პროგრესი და თავისუფლება ერთ ბლოკად აპირებენ მონაწილეობას.

კახა ოქრიაშილი 2004 წლიდან პარლამენტის წევრია. 2016 წლამდე ის ნაციონალური მოძრაობის დეპუტატი იყო, 2016 წელს კი ქართული ოცნების მაჟორიტარად გიორგი კვირიკაშვილმა წარადგინა. მას მხარი აქვს დაჭერილი ქართული ოცნების მიერ ინიცირებული არაერთი სადავო კანონპროექტისთვის და ამავდროულად, არ უცხადებდა მხარდაჭერას იმ იდეებს, რასაც მმართველი გუნდი არ იზიარებდა.

  • 2018 წელს კახა ოქრიაშვილმა გენდერული კვოტირების შესახებ კანონპროექტს მხარი არ დაუჭირა;
  • 2018 წელს პლენარულ სხდომებზე არასაპატიო გაცდენების მიხედვით ქართული ოცნებიდან კახა ოქრიაშვილი ლიდერობდა 12 არასაპატიო გაცდენით;
  • 2019 წელს მანვე დაგროვებითი საპენსიო სისტემის შემოღებას მხარი დაუჭირა, შემდეგ კი სისტემა დატოვა;
  • 2019 წელს ოქრიაშვილმა პროპორციული საარჩევნო სისტემის პროექტს მხარი არ დაუჭირა.

პოლიტიკური საქმიანობის გარდა, კახა ოქრიაშვილი ბიზნესმენია, სააფთიაქო ქსელ PSP-ს დამფუძნებელი. ის ქართული ოცნების მილიონერი დეპუტატების სიის ერთ-ერთი წევრია.

რაც შეეხება ძმებ ჩოჩელებს, ცეზარ ჩოჩელი საქართველოს მე-6 მოწვევის პარლამენტის წევრია. ამასთან, ნაციონალური მოძრაობის დროს ის მცხეთაში გუბერნატორის თანამდებობას იკავებდა.