ამერიკის ხმის ცნობით, ბელარუსის ოპოზიციის აქტივისტმა, ოლგა კოვალკოვამ ქვეყანა დატოვა და ამჟამად პოლონეთის დედაქალაქ ვარშავაში იმყოფება. მისი თქმით, ის იძულებული გახდა ქვეყნის დატოვების გადაწყვეტილება მიეღო.

კოვალკოვას 10-დღიანი პატიმრობა 25 აგვისტოს მიუსაჯეს. მან ხუთ სექტემბერს განაცხადა, რომ შინაგან საქმეთა სამინისტროს წარმომადგენლები დაემუქრნენ, თუ ქვეყანას არ დატოვებდა, ისევ დააპატიმრებდნენ. თუმცა ის ამბობს, რომ არ ეშინია და ბელარუსში პოლიტიკური საქმიანობის გაგრძელებას აპირებს.

"ეს ყველაფერი ვერ შემაჩერებს. პოლიტიკურ აქტივობებს გავაგრძელებ და ამისთვის ბელარუსში დაბრუნებასაც ვგეგმავ", — განაცხადა კოვალკოვამ ვარშავაში გამართულ პრესკონფერენციაზე.

ბელარუსში ოპოზიციის აქტივისტებთან ერთად, მედიის წარმომადგენლებსა და აქციის მონაწილეებსაც ხშირად აკავებენ. სხვადასხვა მედიის ჟურნალისტები ბოლოს პირველ სექტემბერს მინსკში ჟურნალისტური საქმიანობის დროს დააკავეს და არასანქცირებულ აქციაში მონაწილეობა დასდეს ბრალად.

რა ხდება ბელარუსში

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ.

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%.

შედეგებს მოსახლეობის დიდი ნაწილი და ოპოზიცია არ აღიარებს და ლუკაშენკოს გაყალბებაში ადანაშაულებს. არჩევნების შედეგები არ აღიარა აშშ-მ, ირლანდიამ, კანადამ და ევროკავშირმა. ამავდროულად, ევროკავშირმა ლუკაშენკოს რეჟიმს სანქციები დაუწესა.

პრეზიდენტის არჩევასთან დაკავშირებული პროცედურის გამო გადადგა ბელარუსის მთავრობა, სამოქალაქო საზოგადოება კი ლუკაშენკოს გადადგომას ითხოვს, თუმცა ის მოქალაქეებს სპეცრაზმითა და ჯარის ძალით პასუხობს.

აქციებზე ცრემლსადენი გაზით, ხელკეტებით, წყლის ჭავლითა და რეზინის ტყვიებით დაშავდა ათასობით ადამიანი, დააკავეს შვიდი ათასზე მეტი. ბელარუსის ჯანდაცვის სამინისტროს ინფორმაციით, აქციებზე გარდაიცვალა 3 ადამიანი, თუმცა ქვეყნის შინაგან საქმეთა სამინისტრო მხოლოდ ერთის გარდაცვალებას ადასტურებს. გავრცელდა ვიდეოც, სადაც ჩანს, როგორ კლავენ აქციის ერთ-ერთ მონაწილეს.

ქვეყნის დატოვება მოუწია საპრეზიდენტო კანდიდატს, სვეტლანა ტიხანოვსკაიას. თავდაპირველად გავრცელდა ვიდეომიმართვა, რომელშიც მან მომიტინგეებს დანებებისკენ მოუწოდა. არსებობს ვარაუდი, რომ ეს ვიდეო დადგმულია და იძულებითაა ჩაწერილი. მეორე ვიდეომიმართვაში კი ტიხანოვსკაიამ განაცხადა, რომ მზად არის გახდეს ეროვნული ლიდერი და ბრძოლა გააგრძელოს.

ევროპული სახელმწიფოების საპირწონედ არჩევნების შედეგები აღიარა რუსეთმა და ოკუპირებულმა აფხაზეთმა. მეტიც, კრემლმა ბელარუსს კოლექტიური სწრაფი რეაგირების ძალების მეშვეობით დახმარება შესთვაზა აქციების დასაშლელად.