"ქალბატონო სალომე!თქვენს პოსტში არა მხოლოდ არასწორი სიტყვები და ორთოგრაფიული შეცდომებია, არამედ თავიდან ბოლომდე შეცდომა ხართ " — წერს ქართული ოცნების დეპუტატი, ნინო წილოსანი სოციალურ ქსელში.

წილოსანი, საქართველოს პრეზიდენტ სალომე ზურაბიშვილის მიერ შინაგან საქმეთა სამინისტროს განცხადების შესახებ დაწერილ პოსტს ეხმაურება.

ქართული ოცნების დეპუტატმა თავის პოსტში მიმართა იმ პირებსაც, ვინც ხვალ, მისი თქმით, "საქართველოს პარლამენტის მუშაობაში ხელის შეშლას აპირებს". წილოსანის თქმით, "სტრატეგიული ან განსაკუთრებული მნიშვნელობის ობიექტის ხელში ჩაგდება ან ბლოკირება სისხლის სამართლის დანაშაულია":

"ხოლო მათ ვინც ხვალ, საქართველოს პარლამენტის მუშაობაში ხელის შეშლას და ანარქიას აპირებს, არსებობს კანონი და დემოკრატიის დაცვის საერთაშორისოდ მიღებული ნორმები - სტრატეგიული ან განსაკუთრებული მნიშვნელობის ობიექტის ხელში ჩაგდება ან ბლოკირება- არის დანაშაული და ისჯება სისხლის სამართლის მუხლებით, პატიმრობით .. მუხლი 222." — წერს წილოსანი.

შინაგან საქმეთა სამინისტრო 24 ნოემბრიდან რამდენიმე ოპოზიციური პარტიის მიერ პარლამენტთან დაგეგმილ აქციებთან დაკავშირებით ორგანიზატორებს აფრთხილებს, რომ "პირდაპირ აკრძალულია სტრატეგიული ან განსაკუთრებული მნიშვნელობის ობიექტის ბლოკირება".

როგორც შსს-ს განცხადებაშია აღნიშნული, პარლამენტის შენობა და მთავრობის ადმინისტრაცია სტრატეგიული მნიშვნელობის ობიექტებია, შესაბამისად, მათი ბლოკირება ისჯება სისხლის სამართლის კოდექსით და ითვალისწინებს თავისუფლების აღკვეთას ვადით ორ წლამდე, ხოლო თუ ქმედება ჯგუფურადაა ჩადენილი - ჯგუფის წევრების მიმართ თავისუფლების აღკვეთას 4 წლამდე ვადით.

საქართველოს პრეზიდენტი სალომე ზურაბიშვილი შსს-ს გავრცელებულ განცხადებას თავის სოციალურ ქსელში გამოეხმაურა.

"ბარემ ეთქვათ ყველას დაგიჭერთო… ესეც კიდევ ერთ და მთავარ კონსტიტუციის პრინციპის - მანიფესტაციის და შეკრების უფლების - დარღვევა! რა მნიშვნელობა აქვს, კანონით თუ დადგენილებით ზღუდავენ ამ უფლებას! მუქარაც არაფერში ჯდება… რუსული სტილის მმართველობის კიდევ ერთი დასტურია!" — დაწერა ზურაბიშვილმა.