გიორგი ვაშაძის განცხადებით, მას არანაირი შეთანხმება არ დაურღვევია, როცა ისანში კანდიდატურა დააყენა და თუ ნაციონალური მოძრაობა კანდიდატს დაუყენებს, ამით შეთანხმებას დაარღვევს.

"მე ცხოვრებაში არც ერთი შეთანხმება არასდროს დამირღვევია. ამ შეთანხმებებზე მონაწილეობდა სხვა პილიტიკური პარტიები და მათაც შეგიძლიათ კითხოთ შეთანხმებასთან დაკავშირებით. არასდროს ჩემს სიტყვას არ გავტეხ, არც ერთ შეთანხმებას არ დავარღვევ, იგივეს მოლოდინი მაქვს ყველასთან.

თუ ნაციონალური მოძრაობა ამ შეთანხმებას დაარღვევს, ამომრჩეველი ნახავს და შეაფასებს ამ ყველაფერს და, იმედია, აქამდე არ მივა ეს პროცესი. მე შეთანხმება არ დამირღვევია, მე დავდექი ისანში როგორც გიორგი ვაშაძე", — აცხადებს გიორგი ვაშაძე.

ნაციონალური მოძრაობა მსჯელობს ისანში მაჟორიტარობის კანდიდატის დაყენებასთან დაკავშირებით. ამ ინფორმაციას ნაციონალური მოძრაობის წევრი, ხატია დეკანოიძე ჟურნალისტებთან საუბარში ადასტურებს, თუმცა მისი თქმით, საბოლოო შედეგი არ დამდგარა.

"გიორგი ვაშაძემ თვითონ დაარღვია ის ერთობა, რომლის ნაწილიც იყო. შეთანხმებული იყო მისი ერთობაში ყოფნა და მისი ამბიციების გამო, როცა იგი სიაში ითხოვდა 10-ზე მეტ ადამიანს და პრემიერობის კანდიდატის დასახელებას, როდესაც ჩვენ ვფიქრობდით, რომ ამ პარტიულ და ნომენკლატურულ გადაწყვეტილებაზე ყურადღების გამახვილება იყო ჩვენი და ძალიან ბევრი ამომრჩევლის შეურაცხყოფა, არ დავთანხმდით", — განაცხადა ხატია დეკანოიძემ.

27 ივლისს, გიორგი ვაშაძემ და თაკო ჩარკვიანმა პოლიტიკურ პარტიათა კოალიცია, ძალა ერთობაშია დატოვეს და ახალი პოლიტიკური პლატფორმა, სტრატეგია აღმაშენებელი წარადგინეს. მათი განცხადებით, სტრატეგია აღმაშენებელი ამ ეტაპზე კიდევ ორ სუბიექტს — ახალი საქართველო და კანონი და სამართალს აერთიანებს.

კოალიციიდან წასვლის შემდეგ ვაშაძე ენმ-ს წევრებმა გააკრიტიკეს. მათ შორის, პარტიის ლიდერმა, მიხეილ სააკაშვილმა მისი წასვლა "ბნელ მხარეზე" გადასვლად შეაფასა. პასუხად ვაშაძემ ვარსკვლავური ომების პერსონაჟის ტანზე თავი მიიფოტოშოფა და დაპოსტა, რომ ბნელ ძალას დაამარცხებდა.

რაც შეეხება მაჟორიტარ კანდიდატებს, გიორგი ვაშაძე ოპოზიციის გაერთიანების საერთო კანდიდატებს შორის იყო დასახელებული იქამდე, სანამ ძალა ერთობაშიას დატოვებდა.