საქართველოს პრემიერ მინისტრის განცხადებით, მთავრობა ონკოდაავადებული ადამიანების მკურნალობის სრულად დაფინანსებას აპირებს. ამის შესახებ გიორგი გახარიამ მთავრობის სხდომაზე განაცხადა და აღნიშნა, რომ ამ საკითხზე მინისტრთა კაბინეტი სწორედ დღეს იმსჯელებს.

"ონკოდაავადებათა მკურნალობის თვალსაზრისით არის პრობლემები, იმიტომ, რომ აქ ჩნდება მეოთხე ეტაპის პრობლემა, როდესაც სიმსივნის გამოვლენის შემთხვევაში ჩვენს მოქალაქეებს მკურნალობისთვის ჯიბიდან გადახდა უწევდათ. დღეის მდგომარეობით, ჩვენ უნდა ვიმსჯელოთ და დარწმუნებული ვარ მივიღებთ გადაწყვეტილებას და ამ პროგრამას რვა ათასი ლარით გავზრდით და ფაქტობრივად, თითოეულ ჩვენს მოქალაქეს, რომელიც ებრძვის ამ მძიმე სენს, ექნება შესაძლებლობა სრული კურსი მკურნალობისა ჩაიტაროს ყველანაირი ჯიბიდან გადასახადების გარეშე. ეს იქნება უმნიშვნელოვანესი სახელმწიფო მხარდაჭერა ადამიანებისთვის, რომლებიც მძიმე სენს ებრძვიან და რომლებიც შეძლებენ სრული მკურნალობა სახელმწიფოსგან მიიღონ", — განაცხადა გახარიამ.

დაფინანსების შესახებ უფრო მეტი მას შემდეგ გახდება ცნობილი, რაც მთავრობის სხდომა დასრულდება.