საზოგადოებრივი მაუწყებელი ტელეკომპანია ფორმულას კომუნიკაციების მარეგულირებელ კომისიაში უჩივის. ინფორმაციას ამის შესახებ ფორმულა ავრცელებს. საჩივრის მიზეზი გადაცემა ფსკერის საზოგადოებრივი მაუწყებლის შესახებ მომზადებული იუმორისტულ-სატირული სკეტჩია.

ფორმულა საჩივრის ნაწყვეტს აქვეყნებს, საიდანაც ირკვევა, რომ საზოგადოებრივი მაუწყებელი სატირულ სკეტჩს მაყურებლის შეცდომაში შეყვანისკენ განზრახ მიმართულ ქმედებად მიიჩნევს.

"მიგვაჩნია, რომ იუმორისტულ სკეტჩად შეფუთული პირველი არხის გადაცემის "ახალი დღე" უნიჭო იმიტაცია, განზრახ მიმართული იყო მაყურებლის შეცდომაში შეყვანაზე, რადგან პირველი არხის სახელით და "არაიუმორისტული" ფორმით, გადაცემა "ფსკერის" სახელით გავრცელდა პოლიტიკური კონტექსტის მქონე კონტენტი. ნდობა — ეს არის ერთ-ერთი ღირებულება, რასაც ეფუძნება საზოგადოებრივი მაუწყებელი. სწორედ ამიტომ, კატეგორიულად მიუღებლად მიგვაჩნია პირველი არხის სახელით ეთერში, თუნდაც "იუმორის" სახით შეფუთული კონტენტის მომზადება და ეთერში გაშვება", — წერია საზოგადოებრივი მაუწყებლის საჩივარში.

გადაცემა ფსკერის ავტორსა და წამყვანს, ნიკა ქავთარაძეს იმედი აქვს, რომ მარეგულირებელი კომისია საჩივარს იუმორით შეხედავს.

"ეს არის რეალურად მცდელობა იმისა, რომ რაღაც უცნაური შეფუთვით გამოხატვის თავისუფლება შეზღუდონ. ამაშია მთავარი პრობლემა იმიტომ, რომ კომედიაა. ეს არის აქ მთავარი, რომ ეს არის იუმორისტული გადაცემა და შესაბამისად, აქ არ არსებობს შეზღუდვა", — აცხადებს ნიკა ქავთარაძე ფორმულას ეთერში.

გადაცემა ფსკერში გავიდა საზოგადოებრივი მაუწყებლის მიერ მომზადებული გადაცემის იმიტაცია, სადაც ასახულია ფულის წყალში გადაყრის ფინალი. ოთხი ადამიანი, რომლებსაც მაისურებზე აწერიათ საპენსიო ფონდი, ჯანდაცვის სამინისტრო, საქართველოს რკინიგზა და სპორტისა და კულტურის სამინისტრო, თბილისის ზღვაზე აწყობენ "საჩვენებელ ფულის ყრას".