საქართველოს თავდაცვის მინისტრმა, ირაკლი ღარიბაშვილმა, აფხაზეთის ომზე საუბრისასაც "წინა ხელისუფლება" ახსენა და აღნიშნა, რომ არჩევანის გაკეთების წინ, აუცილებლად ყველას უნდა ახსოვდეს, თუ რასთან აქვს საქმე.

"მთავარი მონაპოვარი, რაც ჩვენმა ხელისუფლებამ და პირადად, ბატონი ბიძინა ივანიშვილის მოსვლამ განაპირობა, ეს არის მშვიდობა, სტაბილურობა და თავისუფლება ჩვენი მოქალაქეების. ჩვენ კარგად გვახსოვს, რომ აფხაზეთის ომის შედეგად 300 000 ჩვენი მოქალაქე გახდა დევნილი, სულ რაღაც 10 წლის წინ, ყოფილმა ხელისუფლებამ 300 000 ჩვენი თანამოქალაქე გაასამართლა. როცა ვდგებით არჩევანის წინაშე, ყოველთვის უნდა გვახსოვდეს, თუ რასთან გვაქვს საქმე", — განაცხადა ღარიბაშვილმა.

აფხაზეთის ომის დაწყებიდან 28 წელი გავიდა. ომი 1992 წლის 14 აგვისტოს დაიწყო. აფხაზეთი 1993 წლის 27 სექტემბერს დაეცა.