თბილისის ცენტრალური საავადმყოფო პროკურატურის მიერ წარდგენილ ბრალდებებს უარყოფს და ბრალდების საფუძვლად მოყვანილ არგუმენტაციას აბსურდულს და საქმის ფაქტობრივ გარემოებებთან სრულიად შეუსაბამოს უწოდებს. კლინიკამ განცხადება ფეისბუქ გვერდზე გაავრცელა.

განცხადებაში აღნიშნულია, რომ სრულიად მცდარია პროკურატურის ბრალდება, თითქოს თაღლითური გზით, უსაფუძვლოდ განხორციელდა პაციენტის ოჯახის წევრების დარწმუნება, იტალიელი ექიმების მიერ მომსახურების გაწევასთან დაკავშირებით.

მათი ინფორმაციით, კლინიკა ბოლო რამდენიმე წელია თანამშრომლობს იტალიის ქალაქ ბერგამოს საუნივერსიტეტო კლინიკის პროფესორებთან, რობერტო აგაცისთან და რობერტო ნანისთან და მათი მეთვალყურეობის ქვეშ, კლინიკის სამედიცინო გუნდის ჩართულობით, ბოლო 3 წლის განმავლობაში 98 პაციენტს გადაუდებელი ოპერაცია წარმატებით ჩაუტარდა.

თბილისის ცენტრალუსი საავადმყოფო ამბობს, რომ იტალიელი ექიმების ჩართულობა იმ შემთხვევაშიც დასტურდება, რა შემთხვევასაც კლინიკას პროკურატურა ედავება.

"პაციენტ ნ.ც-ს, სიმსივნური წარმონაქმნის აბლაციის მიზნით, ქართველ-იტალიელ ექიმთა ჯგუფის მიერ წარმატებული ოპერაცია, პირველად ჩაუტარდა 2018 წლის 18 სექტემბერს. ოპერაციას მეთვალყურეობდა და ზედამხედველობდა ცნობილი იტალიელი ექიმი რობერტო აგაცი. მოცემული ოპერაციის დადებით შედეგებზე მეტყველებს ის ფაქტი, რომ პაციენტს მნიშვნელოვნად მოეხსნა პათოლოგიით გამოწვეული ჩივილები.

გარკვეული პერიოდის შემდეგ, პაციენტმა კვლავ იგრძნო დისკომფორტი, იტალიელ ექიმებთან განმეორებითი კონსულტაციის შედეგად და მისი მოთხოვნით, 2018 წლის 11 ნოემბერს დაიგეგმა ხელმეორე ოპერაცია. ოპერაციის დაწყებისას, ანესთეზიოლოგის მიერ პაციენტის ანესთეზიის პროცესში მისი მდგომარეობა გაუარესდა და მიუხედავად, იტალიელ-ქართველი ექიმების ჯგუფის მზაობისა, ქირურგიული ჩარევის მაგივრად საჭირო გახდა რეანიმაციული ქმედებების განხორციელება. ყოველივე ზემოაღნიშნულიდან გამომდინარე, სრულიად გაუგებარი და აუხსნელია, სად იკვეთება თაღლითური ქმედების ნიშნები", — წერს კლინიკა.

ამასთან, თბილისის ცენტრალური საავადმყოფო უსაფუძვლოს და მცდარს უწოდებს პროკურატურის განცხადებას იმის შესახებაც, რომ ექიმ ვახტანგ ყიფიანს ოპერაციის შესაბამისი ლიცენზია არ გააჩნდა. კლინიკა ამტკიცებს, რომ ის ცნობილი და ლიცენზირებული ექიმია ინტერვენციული რადიოლოგიის დარგში, 15 წელზე მეტი სტაჟით.

რაც შეეხება კიდევ ერთ ექიმს, მაგდა ხოჭოლავას, კლინიკა არ ეთანხმება პროკურატურის განცხადება, თითქოს ის ყიფიანმა "დაიხმარა" და აღნიშნავს, რომ ხოჭოლავა ანესთეზიოლოგია, ანესთეზია კი დამოუკიდებელი სამედიცინო პროცესია. რაც შეეხება მის კვალიფიკაციას, საავადმყოფოს თქმით, ამაზე მეტყველებს მრავალწლიანი გამოცდილება, როგორც საქართველოში, ასევე ქვეყნის გარეთ, კერძოდ, იტალიაში. მათივე ინფორმაციით, ხოჭოლავას იტალიაში შესაბამისი ორგანოს მიერ გაცემული ლიცენზია გააჩნია.

კლინიკაში ასევე ამბობენ, რომ მცდარია ინფორმაცია, თითქოს ხოჭოლავა გამოძიებას თავს არიდებს და ქვეყანა სპეციალურად დატოვა. მათი განმარტებით, ის იტალიაში ცხოვრობს და მოღვაწეობს.

საავადმყოფოში აბსურდულად მიაჩნიათ პროკურატურის განცხადება იმის თაობაზეც, რომ კლინიკის დირექტორმა, გიორგი ლობჟანიძემ ჯეროვნად არ შეასრულა თავისი სამსახურეობრივი მოვალეობა და დაუდევრად მოეკიდა პაციენტის სიცოცხლესა და ჯანმრთელობას.

პაციენტის სრული სამედიცინო პროცედურების დაცვით ჩაუტარდა და დღემდე უტარდება ყველა საჭირო სამკურნალო პროცედურა და ამ საკითხთან დაკავშირებით დირექტორის მიერ ამ ხნის განმავლობაში ხორციელდებოდა სრული კომუნიკაცია პაციენტის კანონიერ წარმომადგენელთან.
აღსანიშნავია, რომ შესაბამისი ორგანოების მიერ გამოძიება მიმდინარეობდა თითქმის 2 წლის განმავლობაში. აღნიშნულ პერიოდში, საქმესთან ყველა დაკავშირებული პირი, აქტიურად თანამშრომლობდა გამოძიებსთან. სამედიცინო დაწესებულების ინტერესში შედის, სასამართლოს გზით დადგინდეს სრული ჭეშმარიტება აღნიშნულ საქმესთან დაკავშირებით, თუმცა მიუღებლად მიგვაჩნია ამ მოცემულობაში ექიმების მოულოდნელი დაკავება და მთელი რიგი უსაფუძვლო ბრალდებების წაყენება", — აცხადებენ კლინიკაში.

გუშინ, 4 აგვისტოს საქართველოს პროკურატურამ გაავრცელა ინფორმაცია თბილისის ცენტრალური საავადმყოფოს დირექტორისა და ექიმის დაკავების შესახებ. უწყების ინფორმაციით, კლინიკის ექიმმა პაციენტი დაარწმუნა, რომ ქირურგიულ ოპერაციას იტალიიდან მოწვეული ექიმები ჩაუტარებდნენ, თუმცა ოპერაცია, შესაბამისი ლიცენზიის გარეშე, თავად გაუკეთა, რის შემდეგაც პაციენტი ამ დრომდე კომაშია.