ფეხბურთის ფედერაციის ყოფილი ვიცე-პრეზიდენტის, ლერი სულაბერიძის საქმეზე დაკავებულ ირაკლი ღლონტს აღკვეთი ღონისძიების სახით სასამართლომ პატიმრობა შეუფარდა. აღნიშნული გადაწყვეტილება თბილისის საქალაქო სასამართლოს მოსამართლე ეკატერინე კულულაშვილმა გამოიტანა.

ბრალდებულ ირაკლი ღლონტს მოსამართლემ პროკურორის შეურაცხყოფის გამო სასამართლო დარბაზი დაატოვებინა. მან პროკურორს "ლაწირაკი ბავშვი" უწოდა.

დაკავებულის ადვოკატის თქმით, ბრალდების მხარის შუამდგომლობა პატიმრობის გამოყენების შესახებ დაუსაბუთებელი იყო და სასამართლომ მხოლოდ ფორმალურად იმსჯელა და ისე მიიღო გადაწყეტილება. ადვოკატის თქმით, დაცვის მხარე გაასაჩივრებს აღკვეთ ღონისძიებას.

პროკურატურამ ფეხბურთის ფედერაციის ყოფილი ვიცე-პრეზიდენტის, ლერი სულაბერიძის მანქანის მიმართულებით სროლის საქმეზე ბრალდებულ ირაკლი ღლონტს ბრალი გუშინ წარუდგინა. უწყება მას განზრახ მკვლელობის მცდელობასა და ცეცხლსასროლი იარაღის მართლსაწინააღმდეგო შეძენა, შენახვა-ტარებას ედავება.