2018 წელს ცესკოს თავმჯდომარის თანამდებობრივი სარგო 55%-ით გაიზარდა, მოადგილის 68%-ით, მდივნის კი 70%-ით. ინფორმაცია ამის შესახეხებ სამართლიანი არჩევნებისა და დემოკრატიის საერთაშორისო საზოგადოების (ISFED) ანგარიშშია მოცემული. ორგანიზაცია ამბობს, რომ არ არის განსაზღვრული ის კრიტერიუმები, რომლის მიხედვითაც საქართველოს ცენტრალური საარჩევნო კომისია ადგენს საოლქო საარჩევნო კომისიების დახმარე და ტექნიკური პერსონალის ანაზღაურების ოდენობებს.

ISFED-მა 2016-2019 წლებში საქართველოს ცენტრალური საარჩევნო კომისიის წევრთა და თანამშრომელთა საქმიანობის ანაზღაურებაზე გაწეული ხარჯები შეისწავლა. ორგანიზაციის ინფორმაციით, კრიტერიუმების გარდა, ასევე არ არის განსაზღვრული თანამდებობრივი სარგოს მატების პერიოდულობა და პროცენტული მოცულობა.

"ასევე არ არის განსაზღვრული ის ფაქტობრივი თუ სამართლებრივი საფუძვლები, რომელიც ფულადი სახსრების განაწილების წესს უფრო ნათელ და განჭვრეტად ჩარჩოებში მოაქცევს", — აღნიშნულია ანგარიშში.

კვლევის თანახმად, 2018 და 2019 წლებში ჯილდოს და დანამატის გაცემის სიხშირე და მოცულობა შემცირებულია, რაც პოზიტიური ტენდენციაა. თუმცა, ორგანიზაციაში ამბობენ, რომ ეს ცვლილება თანამდებობრივი სარგოს გაზრდის ხარჯზე მოხდა, რაც იმას ნიშნავს, რომ დანამატი და პრემია/ჯილდოზე გამოყოფილმა თანხებმა თანამდებობრივ სარგოში გადაინაცვლა.

თამარ ჟვანია საქართველოს ცენტრალურ საარჩევნო კომისიას 2013 წლიდან ხელმძღვანელობს. მის მიერ 2016 წელს აღებულმა ხელფასმა, პრემიამ და დანამატმა 200 ათასს მიაღწია. 2018 წელს, წინასაარჩევნო პერიოდში, 4 თვეში ჟვანიამ 80 750 ლარი გამოიმუშავა.

რაც შეეხება წლიურ მონაცემებს, ჟვანიას შემოსავალი დეკლარაციისა და ცესკოდან გამოთხოვილი ინფორმაციის მიხედვით, ასეთია:

  • 2018 წლის 11 თვე — 152 150 ლარი;
  • 2017 წლის 12 თვე — 143 674 ლარი;
  • 2016 წლის 12 თვე — 197 307 ლარი.