ვაქცინის პირველად გამოყენებას 2021 წლამდე არ უნდა ველოდოთ. ამაზე, ჯანდაცვის მსოფლიო ორგანიზაციის გადაუდებელი პროგრამების აღმასრულებელმა დირექტორმა, მაიკ რაიანმა ჟურნალისტებთან ისაუბრა.

მისი თქმით, მიუხედავად იმისა, რომ მკვლევრებს ვაქცინის დამზადების პროცესში შესამჩნევი პროგრესი აქვთ, პრიორიტეტული ადამიანთა უსაფრთხოებაა.

"ჩვენ უნდა შევძლოთ თვალებში ჩავხედოთ ჩვენს საზოგადოებას და დავარწმუნოთ ისინი, რომ ყველა შესაძლო ზომა მივიღეთ მათი უსაფრთხოებისთვის. ჩვენ ბოლომდე უნდა დავრწმუნდეთ, რომ ეს ვაქცინები იქნება უსაფრთხო და ეფექტური, სანამ მათ მოსახლეობას მივაწვდით", — განაცხადა რაიანმა.

მან ასევე დაამატა, რომ რამდენიმე პოტენციურმა ვაქცინამ გაიარა კვლევების სამი ფაზა და წარმატებით მოახდინა იმუნური სისტემის პროვოცირება.

22 ივლისის მონაცემებით, მსოფლიოში კორონავირუსით ინფიცირებულთა რიცხვმა 15 მილიონს გადააჭარბა. აქედან 9 209 574 ადამიანი გამოჯანმრთელდა, 618 061 გარდაიცვალა.

ინფიცირებულთა რაოდენობით პირველ ადგილს იკავებს შეერთებული შტატები, სადაც 4 069 728 შემთხვევაა დაფიქსირებული. მეორე ადგილზეა ბრაზილია 2 178 159 შემთხვევით. რაც შეეხება ინდოეთს, აქ კოვიდინფიცირებულთა რიცხვი 1 239 593-ს აღწევს.

ამავე თემაზე: