მალტა პირველი ევროპული ქვეყანაა, რომელმაც "ჰომოსექსუალობისგან განკურნების" მიზნით, თერაპიების ჩატარება აკრძალა. ინფორმაციას გარდიანი ავრცელებს.

პარლამენტმა ერთხმად დაამტკიცა კანონპროექტი, რომელიც უკანონოდ თვლის ყველა ქმედებას, რომელიც ჰომოსექსუალის საკუთარი "სექსუალობისგან განკურნებას" ისახავს მიზნად.

ახალი კანონის მიხედვით, ყველა, ვინც ეცდება შეცვალოს, შეზღუდოს ან გააქროს პიროვნების სექსუალური ორიენტაცია, გენდერული იდენტობა და გენდერული გამოხატულების აქტი, ჩაითვლება დამნაშავედ და მოუწევს ჯარიმის გადახდა ან ციხეში ჩაჯდომა.

მაგალითად, მედიკოსები, რომლებიც თერაპიებს "ჰომოსექსუალობისგან განკურნების" მიზნად ჩაატარებენ, 10 000 ევროს ჯარიმის გადახდა და ერთი წლით თავისუფლების აღკვეთა მოუწევთ. ისინი, ვინც ლგბტ პირების ქმედებებს სხვა მხრივ შეზღუდავენ, 1 000-დან 5 000 ევრომდე დაჯარიმდებიან და ციხეში 1 წელზე ნაკლებ დროს გაატარებენ.

მას შემდეგ, რაც მალტაში სოციალისტური მთავრობა აირჩიეს, ქვეყანაში უამრავი პროგრესული რეფორმა გატარდა და ის ILGA-მ ((ლგბტ საკითხებზე მომუშავე ორგანიზაციათა გაერთიანება) ორჯერ დაასახელა ევროპულ ქვეყანად, რომელიც პატივს სცემს გეი, ლესბოსელ, ბისექსუალ, ტრანს და ინტერსექს ადამიანებს.

ახალი კანონი ასევე 16 წლამდე ამცირებს იმ ასაკს, რომელიც პიროვნებას მშობლების თანხმობის გარეშე სქესის შეცვლის მოთხოვნის უფლებას ანიჭებს.