მედიაექსპერტი ნინო დანელია ელექტრონული კომუნიკაციების კანონში შესატან ცვლილებებს დანელია ცენზურის მცდელობად აფასებს.

მისი თქმით, ამ გზით ხელისუფლებას სურს, რომ წინასაარჩევნოდ მედიაში მმართველი გუნდის კრიტიკა შემცირდეს.

"ეს არის პირდაპირი ცენზურა, რომელიც იყო საბჭოთა კავშირის დროს. ეს ემსახურება ერთადერთ მიზანს — წინასაარჩევნოდ როგორმე შემცირდეს ხელისუფლების კრიტიკა მედიაში, როგორმე ადამიანებმა ვერ გაიგონ რა შეცდომებს უშვებს ქართული ოცნება და როგორმე გაიხანგრძლივოს დარჩენა ხელისუფლებაში და ძალაუფლება. ეს არის ყოვლად დაუშვებელი", — განაცხადა დანელიამ TV პირველთან.

როგორც დანელია ამბობს, ეს არა მხოლოდ მედიის სფეროს წარმომადგენლების, არამედ მოქალაქეების საქმეცაა, თუ მათ თავისუფალ ქვეყანაში ცხოვრება სურთ.

"ეს არ არის მხოლოდ მედიასპეციალისტების ან ჟურნალისტების ან მედიაორგანიზაციების საქმე, ეს არის თითოეული მოქალაქის საქმე, თუკი მათ უნდათ თავისუფალ ქვეყანაში ცხოვრება, სადაც ხელისუფლება იზრუნებს საჯარო სეკეთისთვის, მათი სიკეთისთვის და არ წავალთ ჩრდილო კორეის მიმართულებით", — განაცხადა დანელიამ.

კომუნიკაციების მარეგულირებელ კომისიას შესაძლოა, ელექტრონული კომუნიკაციების სპეციალური მმართველის დანიშვნის უფლება მიეცეს. კომისიისთვის აღნიშნული ბერკეტის მიცემას ელექტრონული კომუნიკაციების შესახებ კანონში შესატანი ცვლილებები ითვალისწინებს, რომლის ინიციატორიც საქართველოს მთავრობაა.

კანონპროექტის თანახმად, თუ კომისიის მიერ ავტორიზებული/ლიცენზიის მფლობელი პირისათვის დაკისრებული ჯარიმები ვერ უზრუნველყოფს კომისიის გადაწყვეტილების აღსრულებას, კომისია უფლებამოსილია დანიშნოს სპეციალური მმართველი, რომელიც უზრუნველყოფს კომისიის გადაწყვეტილების აღსრულებას. ამავე კანონპროექტით, კომისიას მმართველის დანიშვნა 2-წლიანი ვადით შეუძლია და ის ანგარიშვალდებული მხოლოდ კომისიის წინაშეა.

კანონპროექტში აღნიშნულია, რომ სპეციალურ მმართველს არ უნდა ჰქონდეს ინტერესთა კონფლიქტი ავტორიზებული/ლიცენზიის მფლობელი პირის მიმართ.

კანონპროექტის მიხედვით, სპეციალურ მმართველს შეეძლება განახორციელოს ავტორიზებული/ლიცენზიის მფლობელი პირის სრული კონტროლი.