საქართველოს პრეზიდენტი, სალომე ზურაბიშვილი ფასილიტატორ ელჩებს შეხვდა და განაცხადა, რომ მომავალშიც თავად იქნება სტაბილურობის გარანტი. პრეზიდენტმა ელჩებს მადლობა გადაუხადა პროცესში ჩართულობისთვის, რომელიც მისი თქმით, ქვეყანაში სტაბილურობის გამყარებაზე იყო ორიენტირებული.

"როგორც აქამდე, მე ვიქნები სტაბილურობის გარანტი. შეწყალებასთან დაკავშირებით მიღებული ჩემი გადაწყვეტილება სწორედ ამით იყო განპირობებული. სტაბილურობისა და დეპოლარიზაციისათვის მშვიდი გარემოს უზრუნველსაყოფად, მიუღებელია ფეიკნიუსები, დეზინფორმაცია, სიძულვილის ენა, ჩვენს პარტნიორებზე და სხვადასხვა ორგანიზაციებზე, მაგალითად, ლუგარის ცენტრზე თავდასხმები. იმისათვის, რომ საქართველომ კიდევ ერთი გამოცდა წარმატებით ჩააბაროს და სტაბილურობას არაფერი დაემუქროს, გვმართებს მეტი ყურადღება, რადგან როგორც ქვეყნის შიგნით, ასევე ქვეყნის გარეთ არის სხვადასხვა სახის მცდელობები", — თქვა სალომე ზურაბიშვილმა.

პრეზიდენტმა აღნიშნა, რომ საქართველომ დემოკრატიის ტესტები უკვე ჩააბარა, მაგრამ ეს პროცესი უნდა დასრულდეს და ახლა უმთავრესი მშვიდობიანი და სამართლიანი არჩვენების სამაგალითოდ ჩატარებაა.

ადმინისტრაციის ინფორმაციით, შეხვედრას ესწრებოდნენ ევროკავშირის ელჩი საქართველოში კარლ ჰარცელი, ევროპის საბჭოს ოფისის ხელმძღვანელი კრისტიან ურსე, ამერიკის ელჩი საქართველოში კელი დეგნანი და გერმანიის ელჩი საქართველოში ჰუბერტ ქნირში.