პარტია ქართული ოცნება გერმანიის ელჩთან დაკავშირებით გაკეთებულ განცხადებებს ეხმაურება და მიიჩნევს, რომ მათი ვალია ქვეყნის სახელით ელჩს ბოდიში მოუხადონ. შალვა ნათელაშვილის განცხადებას, სადაც მან ელჩს "ივანიშვილის ლობისტი" უწოდა და გაწვევა მოითხოვა პარტია ოპოზიციის ანტიდასავლური კამპანიის კულმინაციად აფასებს. განცხადებაში, ასევე, აღნიშნულია, რომ ევროპული საქართველოს ლიდერის, გიგა ბოკერიას და თამარ ჩერგოლეიშვილის განცხადებები ნათელაშვილმა უფრო გაამძაფრა.

"გვინდა აღვნიშნოთ, რომ ნათელაშვილის განცხადება არის არა მხოლოდ გერმანელი ხალხისა და გერმანული სახელმწიფოს, არამედ, პირველ რიგში, ქართული საზოგადოების შეურაცხყოფა. ჩვენი ვალია, ჩვენი ქვეყნის სახელით, ბოდიში მოვუხადოთ გერმანიის ელჩს, ბატონ ჰუბერტ კნირშს ჩვენი მოქალაქის უპასუხისმგებლო და არაეთიკური განცხადების გამო", — წერია პარტიის განცხადებაში.

ქართულ ოცნებაში ფიქრობენ, რომ "რაც უფრო ღრმად შევა "რადიკალური ოპოზიცია" მძიმე პოლიტიკურ კრიზისში" მისი უპასუხისმგებლობა კიდევ უფრო გამძაფრდება". მათი აზრით, ეს ქვეყანას გარკვეულ ზიანს მიაყენებს, სწორედ ამიტომ "მყისიერი რეაგირება" აუცილებლად მიაჩნიათ.

"ქართველი ხალხის არჩევანია ქართული დემოკრატიის კიდევ უფრო განმტკიცება და საქართველოს დასავლური მისწრაფებების სრულფასოვანი რეალიზება, რაც 31 ოქტომბრის არჩევნებში კიდევ ერთხელ მყარად დადასტურდება. ეს არჩევანი პოლიტიკაში თავის ადგილს მიუჩენს ყველა იმ პოლიტიკურ ძალას, რომელიც დასავლურ ღირებულებებს უპირისპირდება", — წერია პარტიის განცხადებაში.

განცხადებაში აღნიშნულია, რომ ოპოზიციის ამგვარი რეაქციის მიზეზი ისაა, რომ მათ საკონსტიტუციო ცვლილებების მხარდაჭერა არ სურთ და კანონპოროექტის ჩავარდნის იმედს იტოვებენ.

შალვა ნათელაშვილის განცხადებით, გერმანიის ელჩი "კორუმპირებული რეჟიმის ერთადერთ დამცველად" რჩება. მისი აზრით, ელჩს ივანიშვილის რეჟიმი აფინანსებს.

გერმანიის ელჩმა ჰუბერტ ქნირშმა თქვა, რომ 8 მარტის შეთანხმებაში გიორგი რურუა ნახსენები არ ყოფილა. ეს განაცხადი მან 26 ივნისს ინტერპრესნიუსის ჟურნალისტის კითხვის პასუხად გააკეთა, სადაც ასევე ისაუბრა იმაზეც, რომ შეთანხმების იმპლემენტაციისთვის ორშაბათი, ანუ საკონსტიტუციო ცვლილებების მესამე მოსმენა გადამწყვეტი იქნება.

"ბატონი რურუა არ არის ნახსნები ამ შეთანხმებაში. ეს ძალიან მკაფიოა, ყველას შეუძლია ამის წაკითხვა. გაკვირვებული ვარ, იმ დისკუსიის გამო, რაც პოლიტიკურ პარტიებს შორის გაიმართა, ერთმანეთის დადანაშაულების მცდელობა, როცა ოპოზიცია მმართველ პარტიას ადანაშაულებს კანონპროექტის ჩავარდნაში და პირიქით", — თქვა მან.

მთავარი არხის მეწილის, გიორგი რურუას გათავისუფლებას ოპოზიციის წარმომადგენლები ითხოვენ. ისინი რურუას პოლიტიკურ პატიმრად მოიხსენიებენ. როგორც ნაციონალური მოძრაობა და ევროპული საქართველო აცხადებენ, რურუას გათავისუფლება, სხვა პოლიტპატიმრებთან ერთად 8 მარტის შეთანხმების ნაწილი იყო. აღნიშნულ შეთანხმებას უარყოფენ მმართველ გუნდში და ამბობენ, რომ სასამართლოს სისტემაზე გავლენას ვერ იქონიებენ.