სახალხო დამცველი, ნინო ლომჯარია ამბობს, რომ მამუკა ხაზარაძისა და ბადრი ჯაფარიძის საქმის შესწავლის შედეგად, მასში ფულის გათეთრების ნიშნები ვერ აღმოაჩინეს. პარლამენტის ადამიანის უფლებათა დაცვის კომიტეტზე გამოსვლისას ომბუდსმენმა აღნიშნა, რომ ამ საქმის კვალიფიკაცია არასწორია. მანვე აღნიშნა, რომ ამ საქმეზე მოსამართლეს სასამართლო მეგობრის სტატუსით მიმართეს.

"ხაზარაძე-ჯაფარიძის საქმე ძალიან დეტალურად შევისწავლეთ. ჩვენი მთავარი მიგნება ის, რომ წარდგენილი ბრალი, კვალიფიკაცია არ არის სწორი. საქმეში არ არის შემადგენელი კრიტერიუმები და გარემოებები, რაც შექმნიდა ფულის გათეთრების დანაშაულს. ფულის გათეთრება საერთაშორისო დანაშაულია და მას აქვს თავისი სტანდარტები და თავისი შემადგენელი ელემენტები. ვფიქრობთ, მათ მიმართ წარდგენილი ბრალი იმ სავალდებულო ელემენტებს არ აკმაყოფილებს, რაც საჭიროა იმისათვის რომ პირს წარედგინოს ბრალი ფულის გათეთრებაზე", — თქვა ნინო ლომჯარიამ კომიტეტის სხდომაზე.

14 მაისს საერთაშორისო გამჭვირვალობა — საქართველომ ხაზარაძე-ჯაფარიძის საქმეზე დამოუკიდებელი საერთაშორისო ექსპერტის, პოლინ დევიდის დასკვნა გამოაქვეყნა. დასკვნაში აღნიშნულია, რომ არ არსებობს რაიმე საფუძველი იმის დასამტკიცებლად, რომ მამუკა ხაზარაძემ, ბადრი ჯაფარიძემ ან ავთანდილ წერეთელმა, ინდივიდუალურად ან ჯგუფურად, ფულის გათეთრების დანაშაული ჩაიდინეს.

ექსპერტის დასკვნის თანახმად, არ არსებობს რაიმე ქმედება, რომელიც ფულის გათეთრების დანაშაულს დაადასტურებდა. მისივე თქმით, ბრალდებულთა ქმედებები, რომელსაც პროკურატურა ეყრდნობა, არ სცდება იმ ფაქტებს, რომლის დამტკიცების შემთხვევაში, შესაძლოა ქონების უკანონო დაუფლებას უკავშირდებოდებოს.

მამუკა ხაზარაძის, ბადრი ჯაფარიძისა და ავთანდილ წერეთლის საქმის შესასწავლად საერთაშორისო გამჭვირვალობა — საქართველომ კონკურსი 2019 წლის ნოემბერში გამოაცხადა. როგორც TI-ში აცხადებენ, 2020 წლის იანვარში შეირჩა პოლინ დევიდი, პრაქტიკოსი ადვოკატი სიდნეიდან 30-წლიანი გამოცდილებით, ავსტრალიის ადვოკატთა ასოციაციის წევრი, ექსპერტი ფულის გათეთრების წინააღმდეგ ბრძოლის საკითხებში.

TI-ში აცხადებენ, რომ ექსპერტს ყველა მასალა ინგლისურ ენაზე მიაწოდეს და ის თებერვალში რამდენიმე დღით საქართველოშიც იყო ჩამოსული. ვიზიტის დროს ის საქმის დეტალების მცოდნე სხვადასხვა პირებსა და უწყებების წარმომადგენლებს, მათ შორის ბრალდებულებს, პრაქტიკოს იურისტებს, და ბიზნეს წრეების წარმომადგენლებს.

როგორც ორგანიზაციაში ამბობენ, პოლინ დევიდი ეროვნული ბანკის წარმომადგენლებსაც შეხვდა, ხოლო პროკურატურის წარმომადგენლებმა მასთან შეხვედრაზე უარი განაცხადეს, თუმცა მათ მიერ დაქირავებული უცხოელი ექსპერტების მიერ მომზადებული დასკვნა მიაწოდეს.