ქართული ოცნების აღმასრულებელი მდივანი, ირაკლი კობახიძე 20 ივნისს დაგეგმილ აქციასთან დაკავშირებით ამბობს, რომ არ აპირებენ "200 ნაციონალს" კონტრაქცია დაუპირისპირონ. მისივე თქმით, კონტრაქციასთან დაკავშირებით ოპოზიციამ ცრუ ინფორმაცია გაავრცელა, რადგან "ტყუილი სულში აქვთ გამჯდარი".

როგორც კობახიძე ამბობს, თუ ვინმე შეიკრიბება, პროვოკაცია იქნება.

"ჩვენ მიჩვეულები ვართ, რომ განსაკუთრებით ბოლო პერიოდის განმავლობაში, ოპოზიცია და მისი ტელევიზიები ავრცელებენ რაღაც ფეიკნიუსებს და შემდეგ თვითონვე აკრიტიკებენ ხოლმე თავისივე შექმნილ ფეიკნიუსს, რაც არის აბსურდი. ჩვენ არ ვაპირებთ 200 ნაციონალს დავუპირისპიროთ რაიმე კონტრაქცია. მათ აქვთ უფლება შეიკრიბონ, შეიკრიბებიან და ამით დასრულდება ეს ყველაფერი. ჩიხში არიან ისინი შესულები, ჩაკარგულები არიან საკუთარ ტყუილებში. არც ვიცი რა შედეგი უნდა მოყვეს ამ ყველაფერს, უბრალოდ გამჯდარი აქვთ სულში ტყუილი და კიდევ ერთხელ მოიტყუეს კონტრაქციაზე", — განაცხადა კობახიძემ.

მოძრაობა სირცხვილია 20 ივნისიდან 1 წლის თავზე რუსთაველზე აქციის გამართვას გეგმავს. ორგანიზატორების თქმით, ხელისუფლების ქმედებები 1 წლის თავზეც სირცხვილია. მათივე განცხადებით, ხელისუფლებამ საკუთარ შეცდომაზე სწავლის ნაცვლად, გამოცხადებული ომი კიდევ უფრო გაამწვავა და თავისუფალ აზრს დაუპირისპირა როგორც ადმინისტრაციული რესურსი, ასევე მის მიერ მართული მედია და ასეულობით ყალბი ანგარიში სოციალურ ქსელში.