საქართველოს მთავრობამ უკვე დაადგინა იმ დაწესებულებების ჩამონათვალი, სადაც პირბადის ტარება აუცილებელია და წინააღმდეგ შემთხვევაში, მოქალაქე დაჯარიმდება. ჩამონათვალის შესახებ დღეს მთავრობის ადმინისტრაციის უფროსმა, ნათია მეზვრიშვილმა ისაუბრა:

  • საჯარო და კერძო დაწესებულებების მისაღებში, სადაც ყველაზე მეტად არსებობს შეხება მოქალაქეებთან და ადამიანების ყველაზე მეტი რაოდენობა იყრის თავს;
  • საჯარო და კერძო დაწესებულებებში გამართულ შეხვედრებზე, თავშეყრისას, სადაც შეუძლებელია ორი მეტრის სოციალური დისტანციის დაცვა. მაგალითად, უწყებათაშორისი საბჭოს სხდომაზე, თუ დისტანციის დაცვა შეუძლებელი იქნება;
  • შეხვედრებზე, თავშეყრისას, გამომსვლელს/მომხსენებელს შეუძლია არ გამოიყენოს პირბადე გამოსვლისას, მოხსენების გაკეთებისას, პრეზენტაციის გაკეთებისას თუ ამ ადამიანს შეუძლია ორმეტრიანი სოციალური დისტანციის დაცვა;
  • საერთო სარგებლობის ლიფტებში;
  • სავაჭრო ობიექტებში;
  • სილამაზის სალონებში და ესთეტიკური მედიცინის ცენტრებში;
  • ზოგადსაგანმანათლებლო, პროფესიულ დაა უმაღლეს საგანმანათლებლო დაწესებულებებში;
  • საზოგადოებრივ ტრანსპორტში — მეტრო, მიკროავტობუსი, ავტობუსი, ტაქსი.

გარდა ამისა, იქნება გამონაკლისი, ვინც არ დაჯარიმდება იმის გამო, რომ ამ შენობებში პირბადე არ უკეთია. ეს გამონაკლისებია:

  • 6 წლამდე ასაკის ბავშვები;
  • ადამიანები, რომლებსაც, მაგალითად, აქვთ სასუნთქი სისტემის პრობლემა, აგრეთვე, შშმ პირები და სხვები, რომლებსაც ჯანმრთელობის მდგომარეობიდან გამომდინარე არ შეუძლიათ პირბადის ტარება;
  • სპეციალიზებულ დაწესებულებაში მომსახურე პერსონალი, შესაბამისი სამიზნე ჯგუფისთვის კონკრეტული სოციალური სერვისის მიწოდებისას, მაგალითად, ლოგოპედის მომსახურებისას.

ნათია მეზვრიშვილმა განმარტა, რომ დასაშვები იქნება როგორც სამედიცინო, ისე არასამედიცინო პირბადის გამოყენება.

მან განმარტა, რომ მთავრობამ უკვე მიიღო დადგენილება, რომელშიც ეს წესებია განსაზღვრული. ეს კი იმას ნიშნავს, რომ საქართველოს პარლამენტის მიერ დაწესებული ჯარიმები ამოქმედდება.

დახურულ საჯარო სივრცეში თავშეყრისას, პირბადის ტარების წესის დარღვევისთვის მოქალაქე 20 ლარით დაჯარიმდება, ხოლო იურიდიული პირი — 500 ლარით.