საერთაშორისო გამჭვირვალობა — საქართველოს მიერ საზოგადოებრივი აზრის გამოკითხვამ აჩვენა, რომ მოსახლეობის დიდი ნაწილი მხარს უჭერს საქართველოს გაწევრიანებას ევრო-ატლანტიკურ სტრუქტურებში. ორგანიზაცია კვლევის რამდენიმე შედეგს გამოყოფს:

  • ნატოში გაწევრიანებისგან მოსახლეობა უპირველესად უსაფრთხოებას მოელის;
  • ევროკავშირში გაწევრიანება კი, მათი აზრით, ქვეყანას უპირველესად ეკონომიკურ განვითარებას მოუტანს;
  • მოსახლეობის ნახევარზე მეტი (56%) ფიქრობს, რომ საქართველო უნდა გაწევრიანდეს ნატოსა და ევროკავშირში მაშინაც კი, თუ ეს რუსეთთან ურთიერთობების დაძაბვას გამოიწვევს, 26% კი ამის წინააღმდეგია.
  • გამოკითხულთა თითქმის ნახევარი (49 პროცენტი — 2019 წელთან შედარებით 3 პროცენტული პუნქტით მეტი) ეთანხმება აზრს, რომ რუსეთი ოკუპანტი და საქართველოს მტერია და ტერიტორიების დეოკუპაციის გარეშე, მასთან კეთილმეზობლური ურთიერთობები არ უნდა გვქონდეს, 39% კი, ოკუპაციის მიუხედავად, რუსეთთან ამგვარ ურთიერთობებს ემხრობა. ეს შედეგი შარშანდელ ანალოგიურ კვლევასთან შედარებით 5 პროცენტული პუნქტით დაკლებული მონაცემია.

კვლევა საერთაშორისო გამჭვირვალობა — საქართველოს დაკვეთით 2020 წლის 27 თებერვლიდან 18 მარტის პერიოდში კავკასიის კვლევითი რესურსების ცენტრმა ჩაატარა. ქვეყნის მასშტაბით (გარდა ეთნიკური უმცირესობებით კომპაქტურად დასახლებული არეალებისა და აფხაზეთის და ცხინვალის რეგიონის ოკუპირებული ტერიტორიებისა) 1 763 რესპოდენტი გამოიკითხა. კვლევის ცდომილების ზღვარი 2,2%-ის ფარგლებშია.