25 ნოემბერს, ქალთა მიმართ ძალადობის წინააღმდეგ ბრძოლის საერთაშორისო დღესთან დაკავშირებით, საქართველოს სახალხო დამცველმა განაცხადა, რომ, გასულ წლებთან შედარებით, ოჯახში ძალადობის შემთხვევათა გამოვლენისა და მათზე რეაგირების მაჩვენებელი გაზრდილია.

ომბუდსმენი დასძენს, რომ შესაძლო რისკების თავიდან ასარიდებლად უფრო მეტი ძალისხმევაა საჭირო.

"2016 წლის 10 თვის მონაცემებით, 13 ქალი იქნა მოკლული ოჯახში ძალადობის პირობებში. კვლავ მაღალია ჯანმრთელობის დაზიანებისა და სხვა სასტიკი ფორმებით ჩადენილი ძალადობის რიცხვი, პოლიციამ 2000-ზე მეტ შემთხვევაში გამოიყენა დაცვის ღონისძიება. მაგრამ სამწუხაროდ, იყო შემთხვევები, როდესაც ოჯახში შესაძლო ძალადობის შესახებ შეტყობინება სამართალდამცავ უწყებაში დანაშაულებრივ ქმედებამდე შევიდა თუმცა, დანაშაულის პრევენცია ვერ მოხერხდა" - აცხადებს ომბუდსმენი.

უჩა ნანუაშვილის თქმით, სამართალდამცავი ორგანოების წარმომადგენლების მოქმედებები ხშირ შემთხვევაში არაეფექტიანია და ისინი ძალადობის განმეორების რისკებს სათანადოდ ვერ აფასებენ.

სახალხო დამცველმა საქართველოს მთავრობასა და პარლამენტს მოუწოდა, ხელი შეუწყოს და დააჩქაროს ქალთა მიმართ ძალადობისა და ოჯახში ძალადობის პრევენციისა და აღმოფხვრის საკითხებზე ევროსაბჭოს კონვენციის რატიფიცირება.

ნანუაშვილი მოითხოვს, რომ ფემიციდი, როგორც გენდერული ნიშნით მოტივირებული მკვლელობა, ამ დეფინიციით განსაზღვროს სისხლის სამართლის კანონმდებლობაში.

დღეს ქალთა მიმართ ძალადობის აღმოფხვრის საერთაშორისო დღესთან დაკავშირებით თბილისის ანძა ნარინჯისფრად განათდება.