იქნება თუ არა კრისტოფერ ნოლანის ახალი ფილმი ის, რის გამოც მაყურებლები პანდემიის შემდეგ კინოთეატრებს კვლავ დაუბრუნდებიან?

ამ კითხვაზე პასუხის გაცემა, ალბათ, რთულია, თუმცა ეს მხოლოდ მანამდე, სანამ ფილმის ახალ ტრეილერს ნახავთ: ნოლანის ერთგული მაყურებლები ლამის ყველანაირ სიუჟეტურ მოულოდნელობასა და ვიზუალურ მასშტაბურობას არიან მიჩვეულები, თუმცა, როგორც ჩანს, რეჟისორი აპირებს, საკუთარ თავსაც აჯობოს.

ფილმის ახალი ტრეილერის პრემიერა რამდენიმე საათის წინ ონლაინ ვიდეოთამაშ Fortnite-ში შედგა:

Tenet საიდუმლო აგენტების შესახებ მოგვითხრობს, რომელთა მისიაც მესამე მსოფლიო ომის შეჩერებაა. ფილმში მთავარ როლებს ჯონ დევიდ ვაშინგტონი და რობერტ პატინსონი ასრულებენ.

კრისტოფერ ნოლანის ჯერჯერობით ბოლო ფილმი Dunkirk 2017 წელს გამოვიდა და სამი წლის შემდეგ მაყურებლებს კვლავ შეეძლებათ ამ ცნობილი რეჟისორის ახალი ნამუშევრის შეფასება. თანაც ამ ფილმის გამოსვლას მთელი კინოინდუსტრია ყურადღებით ელოდება: ეს პირველი დიდი პრემიერა იქნება კინოთეატრებში პანდემიის შემდეგ და ყველას აინტერესებს, შეძლებს თუ არა კინოსურათი მაყურებლის მიზიდვას.

აღსანიშნავია, რომ ამ ფილმის გადაღებები $200 მილიონი დაჯდა და ის არა მარტო ნოლანის შემოქმედებაში, არამედ ისტორიაში ერთ-ერთი ყველაზე ძვირად ღირებული ფილმია: მარტო ის რად ღირს, რომ მისი გადაღებები შვიდ სხვადასხვა ქვეყანაში მიმდინარეობდა.

Tenet-ის პრემიერა 17 ივლისსაა დაგეგმილი.