ამერიკელი კონგრესმენი, ადამ კინზინგერი ამბობს, რომ მნიშვნელოვანია 8 მარტის შეთანხმება სრულად შესრულდეს. როგორც მან ამერიკის ხმასთან ინტერვიუს დროს განაცხადა, აშშ არაფერს არ ითხოვს და უბრალოდ ხელს უწყობს, რომ შეთანხმება შედგეს.

"არ დავიწყებ იმის განხილვას, რა გაკეთდა და რა — არა. დემოკრატია რთულია, თუმცა ჩანს, რომ მხარეები რეალური პროგრესისკენ მიდიან, ეს უნდა დავამთავროთ და წინ წავიდეთ, უფრო დიდი საკითხები გვაქვს გადასწყვეტი, როგორიცაა კორონავირუსის შემდგომი განვითარება და მომავალი არჩევნები", — აღნიშნა კინზინგერმა.

კითხვაზე რას ფიქრობდა ის გიორგი რურუას პატიმრობასთან დაკავშირებით, კონგრესმენი ამბობს, რომ ის არ აპირებს მხარეებს რამისკენ უბიძგოს:

"შეთანხმება შედგა, რომლის დეტალებსაც ყველა მხარე ეთანხმებოდა, მნიშნველოვანია, რომ ის სრულად შესრულდეს. ჩანს, რომ ყველა მხარე დგამს ნაბიჯებს რეალური პროგრესისკენ, უნდა გავაგრძელოთ წინსვლა იმაზე, რაც არის და არ არის შესრულებული. საბოლოო ჯამში მოდით, შევასრულოთ შეთანხმება, წავიდეთ წინ და საკითხი საარჩევნო ყუთთან გადავჭრათ".

ოპოზიციასა და მთავრობას შორის მიღწეული საარჩევნო შეთანხმება ისევ განხილვის საგანი გახდა. ოპოზიციაში აცხადებდნენ, რომ შეთანხმებიდან ორი თვის შემდეგ მმართველი გუნდი პირობებს არ ასრულებს, რადგან პოლიტიკოსები ისევ პატიმრობაში არიან. მათი გათავისუფლების გარეშე ისინი უარს აცხადებდნენ, საკონსტიტუციო ცვლილებებისთვის მხარი დაეჭირათ.

ოპოზიციის საპასუხოდ, პარლამენტის თავმჯდომარე აცხადებდა, რომ მმართველ გუნდს პატიმრების გათავისუფლების პირობა არავითარი ფორმით, არავის წინაშე არ დაუდია. თალაკვაძის მტკიცებით, ამას მკაფიოდ ადასტურებს ყველა ფაქტი და დოკუმენტი, მათ შორის თავად შეთანხმების ტექსტი. ქართული ოცნების წარმომადგენლები საუბრობდნენ იმაზეც, რომ ოპოზიციის მოთხოვნა სასამართლოსთვის დავალების მიცემას გულისხმობს, რასაც არ გააკეთებენ.

რამდენიმედღიანი განხილვის შემდეგ პრეზიდენტმა, სალომე ზურაბიშვილმა გიგი უგულავა და ირაკლი ოქრუაშვილი შეიწყალა. ოპოზიციაში აღნიშნეს, რომ პრეზიდენტის ნაბიჯი მისასალმებელია, თუმცა საკონსტიტუციო ცვლილებებს მხარს არ დაუჭერენ თუ საპატიმროს გიორგი რურუაც არ დატოვებს.

8 მარტს, ხანგრძლივი განხილვების შემდეგ, ოპოზიციამ და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.