გიგი უგულავასა და ირაკლი ოქრუაშვილის გათავისუფლებას უკვე გამოეხმაურა ევროპარლამენტარი ანდრიუს კუბილიუსი. მისი თქმით, პრეზიდენტის შეწყალება მნიშვნელოვანი წინსვლაა.

"მნიშვნელოვანი წინსვლა საქართველოში — პრეზიდენტმა ზურაბიშვილმა შეიწყალა ოპოზიციის ორი ლიდერი, თბილისის ყოფილი მერი გიგი უგულავა და თავდაცვის ყოფილი მინისტრი ირაკლი ოქრუაშვილი. სწორი მიმართულებით გადადგმული ნაბიჯი. ჩემი მილოცვა პრეზიდენტ ზურაბიშვილს", — დატვიტა ევროპარლამენტარმა.

პრეზიდენტმა სალომე ზურაბიშვილმა გიგი უგულავა და ირაკლი ოქრუაშვილი დღეს, 15 მაისს შეიწყალა.

ევრონესტის საპარლამენტო ასამბლეაში ევროპარლამენტის დელეგაციის თავმჯდომარე, ერთ-ერთი იყო იმ ევროპელ პოლიტიკოსებს შორის, ვინც საქართველოს მთავრობას დაკავებული პოლიტიკური ლიდერების გათავისუფლებისკენ მოუწოდებდა. მის ამ მოწოდებას მმართველი გუნდის წევრები შემაშფოთებელს უწოდებდნენ და ამბობდნენ, რომ ევროდეპუტატი ხელისუფლებას მართლმსაჯულებაშ ჩარევისკენ მოუწოდებდა, რაც მიუღებელი იყო.

ანდრიუს კუბილიუსი, აცხადებდა, რომ ის დახმარება, რომელსაც საქართველო პანდემიასთან გასამკლავებლად იღებს დაკავშირებულია დემოკრატიულ პროცესებთან, რომელიც მთავრობამ უნდა აჩვენოს. მათ შორის ევროპარლამენტარი აღნიშნავდა მთავრობის მიერ ნაკისრი ვალდებულებების შესრულებას.

"ჩვენ ყველამ ერთად უნდა ვიმუშაოთ ურთიერთნდობის ატმოსფეროში, რათა დავიცვათ დემოკრატია და მივაღწიოთ ამ მიზნებს. ამ ნდობის მიღწევა მხოლოდ წინამდებარე ვალდებულებისა და დაპირებების შესრულების პროგრესირებას შეუძლია, მათ შორის, 2020 წლის 8 მარტს მიღწეული შეთანხმების შესრულებას, რომელიც მიღწეულ იქნა საქართველოს ყველა მთავარ პოლიტიკურ პარტიას შორის", — აცხადებდა კუბილიუსი.

კუბილიუსი წერდა, რომ ოპოზიციასთან 8 მარტს მიღებული შეთანხმების შესრულება მნიშვნელოვანი იყო, რათა მთავრობას მოახლოებულ არჩევნებზე საზოგადოებისა და საერთაშორისო პარტნიორების ნდობა ჰქონოდა.