ადამიანის უფლებების სწავლებისა და მონიტორინგის ცენტრი (EMC) ანტიკრიზისულ გეგმას ეხმიანება და მთავრობას სოციალური მხარდაჭერის უფრო სრულყოფილი, მოქნილი და საყოველთაო პოლიტიკისკენ მოუწოდებს.

როგორც ორგანიზაციაში აცხადებენ,არსებული სოციალური დაცვის სისტემები პროცედურულ ბარიერებს შეიცავს, რაც ბენეფიციართა ნაწილისთვის დახმარების მიღებას აჭიანურებს, ართულებს ან შეუძლებელს ხდის.

მათივე თქმით, ბუნდოვანია, რა ეკონომიკურ მოლოდინებს ეფუძნება მიზნობრივი ჯგუფების ზომებთან დაკავშირებული გათვლები.

"ეს განსაკუთრებით თვალსაჩინო სწორედ თვითდასაქმებულთა შემთხვევაშია — მათთვის განკუთვნილი სოციალური დახმარება დაახლოებით 250 000 ბენეფიციარს ითვალისწინებს, მაშინ, როცა თვითდასაქმებულთა რაოდენობა თითქმის 800 000 ადამიანია. თვითდასაქმებულთა შესახებ არსებული მწირი მონაცემების პირობებში, ეს გათვლა ზედაპირული და შესაძლოა არაზუსტი აღმოჩნდეს", — ამბობენ ორგანიზაციაში.

ორგანიზაციას კითხვები აქვს არაფორმალურად დასაქმებულების თუ თვითდასაქმებული ადამიანების მიმართ შეთავაზებულ დახმარებასთანაც.

"რამდენად ადეკვატურია, ერთჯერადი 300 ლარიანი მხარდაჭერის პაკეტი მაშინ, როდესაც მათ და მათ ოჯახებს კრიზისის შედეგად შეუწყდათ დღიური სარჩო და დღეს შესაძლოა მათი სოციალური სტატუსი უკიდურესად გაუარესდეს", — აცხადებენ ორგანიზაციაში.

როგორ ორგანიზაციაში ამბობენ, დაქირავებით დასაქმებულებისთვის 6 თვის განმავლობაში ყოველთვიური 200 ლარი დახმარების პაკეტი ხარვეზიანი მეთოდოლოგიით არის დაანგარიშებული და საერთაშორისო სტანდარტებს არ შეესაბამა.

EMC-ის განმარტებით, ანტიკრიზისული გეგმის მიღმა რამდენიმე მოწყვლადი ჯგუფი მაინც რჩება, რის გამოც ის ყოვლისმომცველად ვერ ჩაითვლება.

" სამწუხაროდ, სამთავრობო გეგმაში არაფერია ნათქვამი უსახლკაროთა შესახებ, რომლებსაც კრიზისთან გამკლავება გაზრდილი რისკების პირობებში უწევთ. ქვეყანაში არსებული გამოწვევების ფონზე, ქუჩაში მცხოვრები პირები კიდევ უფრო მოწყვლადები ხდებიან", — ნათქვამია EMC-ის განცხადებაში.

მათივე თქმით, ასევე, ბუნდოვანია, რამდენად ითვალისწინებს ანტიკრიზისული გეგმის სოციალური ნაწილი იმ ოჯახების თუ პირების მხარდაჭერას, რომლებიც უცხოურ გადმორიცხვებზე თუ შიდა მხარდაჭერით პრაქტიკებზე დამოკიდებულნი იყვნენ.

ორგანიზაციის განცხადებით, ანტიკრიზისულ გეგმაში არაფერი თქმულა არც მიკროსაფინანსოების თუ კერძო მევახშეების მიერ დაზარალებული მოქალაქეების შესახებ.

მათივე განმარტებით, ნიშვნელოვანია, რომ ანტიკრიზისული გეგმის იმპლემენტაცია მაქსიმალურად სწრაფად დაიწყოს და დახმარების მისაღებად საჭირო პროცედურების შესახებ საზოგადოების, მათ შორის განსაკუთრებით ეთნიკური უმცირესობების, სათანადო ინფორმირება მოხდეს.

ვის დახმარებას გეგმავს მთავრობა, როგორ აპირებს ამას — ანტიკრიზისული გეგმა

24 აპრილს საქართველოს მთავრობამ კორონავირუსთან საბრძოლველი ანტიკრიზისული გეგმა წარადგინა. გეგმა, რომელსაც ოპოზიცია დაგვიანებულს, მთავრობა კი ეფექტურს უწოდებს რამდენიმე ეტაპს მოიცავს.

პირველი ეტაპი

პირველ ეტაპში გაერთიანებულია ის ნაბიჯები, რომლებიც მთავრობამ აქამდე გადადგა: კომუნალური გადასახადების ნაწილობრივ დაფინანსება, 9 ძირითად სასურსათო პროდუქტზე ფასების დაზღვევა, ტურიზმის სფეროს ბიზნესსუბიექტების საშემოსავლო და ქონების გადასახადის გადავადება, მცირე სასტუმროების სახელმწიფო სუბსიდირების პროგრამა, სესხების რესტრუქტურიზაცია იურიდიული პირებისთვის და ა.შ.

მეორე ეტაპი

რაც შეეხება მეორე ეტაპს, მთავრობა აცხადებს, რომ მისი მიზანია პანდემიის ნეგატიური გავლენის შემცირება ეკონომიკაზე. პრემიერის თქმით, პროგნოზებმა აჩვენა, რომ სხვადასხვა ხარჯების გათვალისწინებით, ბიუჯეტის დასაბალანსებლად 3,9 მილიარდია საჭირო.

• -4%-იანი ეკონომიკური ზრდა და 1,8 მილიარდის დანაკარგი — მთავრობის პროგნოზები და მოძიებული რესურსები

• რა საბუთები დასჭირდებათ თვითდასაქმებულებს 300-ლარიანი დახმარების მისაღებად — გახარიას განმარტება

ამ გეგმის ფარგლებში, მთავრობა ამბობს, რომ დამსაქმებლები ყოველ შენარჩუნებულ სამუშაო ადგილზე მიიღებენ სახელმწიფო სუბსიდიას.

გარდა ამისა, 6 თვის განმავლობაში საშუალოდ 600-ლარიან (თვეში 100 ლარი) დახმარებას მიიღებენ სოციალურად დაუცველები და შშმ პირები.

ანტიკრიზისული გეგმის მეორე ეტაპშია გათვალისწინებული პენსიების საკითხიც, რომელიც 2021 წლის იანვრიდან უნდა ამოქმედდეს:

• ყველა პენსიონერის პენსია გაიზრდება არანაკლებ ინფლაციის მაჩვენებლისა;
• 70 წლის და მეტი ასაკის პენსიონერს დაემატება რეალური ეკონომიკური ზრდის 80%.

მთავრობის განმარტებით, ეს ნიშნავს, რომ ფასების ზრდა გავლენას ვეღარ მოახდენს პენსიების რეალურ მოცულობაზე და პენსიის ყოველწლიური ზრდა იქნება ინფლაციაზე მაღალი. ამის გათვალისწინებით, მთავრობა აცხადებს, რომ 70 წლამდე პირებისთვის პენსიის ზრდა არ იქნება 20 ლარზე ნაკლები 70 წელს ზევით კი — 25 ლარზე ნაკლები.

ანტიკრიზისული გეგმა ითვალისწინებს კერძო სექტორის, სოფლის მეურნეობის და აწარმოე საქართველოში მონაწილე მეწარმეების დახმარებასაც.

• წაიკითხეთ ანტიკრიზისული გეგმა სრულად

ეკონომიკის ამოქმედების გეგმა

ეკონომიკის ამოქმედების გეგმა, ანტიკრიზისული გეგმის ნაწილია და თავის მხრივ 6 ეტაპს მოიცავს, რომელთა შორის შუალედი 2 კვირაა. მთავრობის განმარტებით, ეტაპების ამოქმედება დამოკიდებულია ეპიდემიოლოგიურ ვითარებაზე და შესაძლებელია შეზღუდვები ისევ გააქტიურონ, თუ სიტუაცია გაუარესდება.

მაგალითად, პირველი ეტაპი, რომელიც 27 აპრილიდან ამოქმედდება ითვალისწინებს მსუბუქი ავტომობილებითა და ტაქსებით გადაადგილების აღდგენას, ონლაინ ვაჭრობისა და მიტანის სერვისების ამოქმედებას, ასევე, ღია ტიპის აგრარული ბაზრების აღდგენას.

მეორე ეტაპზე, 10 მაისიდან ამოქმედდება მშენებლობები, ავტოსერვისები და სარეკრეაციო ზონები.

• წაიკითხეთ დეტალურად მთავრობის გეგმა ეკონომიკის ამუშავების ეტაპებზე

გაიგეთ რას ფიქრობს ოპოზიცია ანტიკრიზისულ გეგმაზე:

• ბოკერია: დაგვიანებული, ზედაპირული და ბუნდოვანი პრეზენტაცია მოვისმინეთ გახარიასგან
• მათი ამოცანაა შეინარჩუნონ ხელისუფლება, ამიტომ დახმარება არჩევნებამდეა გაწელილი — ვაშაძე
• ისე არ წვიმს, როგორც ქუხს — რომან გოცირიძე მთავრობის ანტიკრიზისულ გეგმაზე
• ეს არის გეგმა, როგორ მოვიგოთ ბიუჯეტზე დამოკიდებული ადამიანის გული — ჯაფარიძე