საქართველოში კორონავირუსით ინფიცირებულთა შორის ნახევარი ქალია, ნახევარი კი კაცი. ყველაზე უფროსი, ვისაც Covid-19 დაუდასტურდა, 87 წლისაა, ყველაზე უმცროსი კი — ორის.

სტატისტიკური მონაცემები დაავადებათა კონტროლის ცენტრმა გამოაქვეყნა. დოკუმენტი შეიცავს ქვეყანაში არსებულ მდგომარეობას 19 აპრილის ჩათვლით.

სწორედ ამ დროის მონაცემებით, კორონავირუსზე ტესტირება საქართველოში 7611 ადამიანს აქვს ჩატარებული. დაავადებათა კონტროლის ეროვნული ცენტრის სტატისტიკიდან ჩანს, რომ ჩატარებული ტესტების რაოდენობამ დღიურად 100-ს მარტის თვის მეორე ნახევარში გადააჭარბა, რის შემდეგაც მაჩვენებელი უმეტესად იზრდება.

ყველაზე მეტ, 403 ადამიანს ტესტირება 15-16 აპრილს ჩაუტარდა. მონაცემები დიაგრამაზე ერთდღიანი შუალედით არის ასახული.

ფოტო: NCDC

NCDC არ აკონკრეტებს, რომელი ტესტია გამოყენებული. თუმცა, გამომდინარე იქედან, რომ სახელმწიფო ამ ეტაპზე ძირითადად PCR ტექნოლოგიას ეყრდნობა, სავარაუდოდ, მონაცემებში მხოლოდ ამ ტიპის ტესტების გამოყენების სტატისტიკაა ასახული.

კიდევ ერთი მონაცემი, რომელსაც დაავადებათა კონტროლის ცენტრი აქვეყნებს, ინფიცირებულთა სიმპტომებია. დიაგრამიდან ჩანს, რომ 19 აპრილის მდგომარეობით, უმრავლეს შემთხვევაში (68%) ცხელება და შემცივნება იყო. შემდეგ მოდის ზოგადი სისუსტე (31%), ხველა (29%), ყელის ტკივილი (20%), თავის ტკივილი (16%). სიმპტომებს შორის იყო დიარეა, ყნოსვისა და გემოს ცვლილება, სახსრების ტკივილი, სურდო, გულმკერდის ტკივილი, გულისრევა/ღებინება. თუმცა, კორონავირუსი დაუდასტურდათ იმ ადამიანებსაც, რომლებსაც სიმპტომები არ ჰქონდათ. ეს მაჩვენებელი არც ისე დაბალია — 9%.

ფოტო: NCDC

ინფიცირებულებს შორის ყველაზე მეტი 15-დან 29 წლამდე ასაკისაა (22%), ყველაზე ნაკლები კი — 2-დან 4-მდე (3%). შედარებით მაღალია 50-59 წლის ასაკის ინფიცირებულების მაჩვენებელიც (19%), თუმცა, არც ერთ ასაკობრივ კატეგორიაში არ არის განსაკუთრებულად ბევრი დადასტურებული შემთხვევა.

ფოტო: NCD

NCDC-ის სტატისტიკაში მოყვანილია შედარება ევროპის ქვეყნების მაგალითთანაც, საიდანაც ჩანს, რომ იქ ყველაზე მეტი ინფიცირებული 50-დან 59-წლამდე ასაკობრივ კატეგორიაში იყო, დაახლოებით 20%. თუმცა გარდაცვალება ყველაზე ხშირად 80 წელს ზემოთ და 70-79 წლამდე ადამიანებში ფიქსირდება.

ფოტო: NCDC

ამ დოკუმენტის მომზადების დროს საქართველოში კორონავირუსის 399 დადასტურებული შემთხვევა იყო, ახლა კი 9 ადამიანით მეტია. უცვლელია გამოჯანმრთელებულთა რაოდენობა — 95.