ფინანსთა სამინისტროს შემოსავლების სამსახურის განცხადებით, საგანგებო მდგომარეობის ფარგლებში მოქმედი შეზღუდვებისა და უსაფრთხოების ნორმების დარღვევის გამო 152 კომპანია დაჯარიმდა. მათივე ინფორმაციით, ჯარიმების საერთო ღირებულება 1 137 000 ლარია.

უწყებაში ამბობენ, რომ 69 დარღვევა რეგიონებში, 83 კი თბილისში გამოავლინეს. მათი განმარტებით, ამოწმებენ, როგორც საგანგებო მდგომარეობისას ნებადართული კომპანიების ფუნქციონირებას, ასევე, მათ ვისაც ეს უფლება შეზღდული აქვთ.

უწყების განცხადებით, დარღვევები გამოავლინეს, როგორც დიდ ჰიპერმარკეტებში, ასევე მცირე და საშუალო ზომის მარკეტებსა და 3 ბაზრის მომწყობ ორგანიაციაში. მათივე თქმით, ადმინისტრაციული სამართალდარღვევის ოქმები შედგა, როგორც სოციალური დისტანციის დაცვის დაუცველობის გამო, ასევე პირბადისა და ხელთათმანების გარეშე მუშაობისთვის.

საგანგებო მდგომარეობის პერიოდში საქართველოში ბიზნესს შეზღუდვები აქვს დაწესებული. ფუნქციონირების უფლების მისაღებად მათ პროფილურ სამინისტროს უნდა მიმართონ და შემოწმება გაიარონ იმის დასადგენად აკმაყოფილებენ თუ არა ჯანდაცვის სამინისტროს მიერ დადგენილ წესებს. საგანგებო მდგომარეობისას დაწესებული შეზღუდვების დარღვევის გამო კომპანიები 15 000 ლარით ჯარიმდებიან.