სახალხო დამცველის განმარტებით, მის მიერ ჯანდაცვის მინისტრისათვის წარდგენილი რეკომენდაციები, რომელიც ოკუპირებულ ტერიტორიებზე მცხოვრები პირებისათვის რეფერალური მომსახურების სახელმწიფო პროგრამით უზრუნველყოფას შეეხებოდა, ჯერ არ შესრულებულა.

ომბუდსმენის თქმით, მან ასევე მიმართა პრემიერ მინისტრს იმისთვის, რომ C ჰეპატიტით სარგებლობის შესაძლებლობა ოკუპირებული ტერიტორიების მცხოვრებ პირადობის ნეიტრალური მოწმობის მქონე ადამიანებსაც შესძლებოდათ, თუმცა, სამინისტრომ ამ პროგრამით მოსარგებლეებში რაიმე სახის ცვლილებების შეტანაზე, მედიკამენტების უსაფრთხოების რისკებიდან გამომდინარე, უარი თქვა.

სახალხო დამცველის განმარტებით, ჯანდაცვის სამინისტროში განმარტეს, რომ საქართველოს მოქალაქეობის მქონე ოკუპირებულ ტერიტორიაზე მცხოვრებ პირთა სამედიცინო მომსახურება სრულად მხოლოდ იმ შემთხვევაში დაფინანსდება, თუ დასტურდება ოკუპირებულ ტერიტორიაზე მათი ცხოვრება:

"2015 წლის საპარლამენტო ანგარიშში, სახალხო დამცველი მოუწოდებს პრემიერ მინისტრს, დაავალოს შესაბამის სტრუქტურებს შეიმუშაონ მექანიზმი ოკუპირებულ ტერიტორიაზე მცხოვრები საქართველოს მოქალაქეობის მქონე პირებისათვის რეფერალურ პროგრამაში ჩართვის თაობაზე და სავალდებულო ხასიათი მიეცეს ოკუპირებულ ტერიტორიაზე მცხოვრები ყველა პირის მიმართ ერთგვაროვან პრაქტიკას, მიუხედავად მოქალაქეობისა".

გარდა ამისა, ომბუდსმენი განმარტავს, რომ სახელმწიფოს სოციალური სერვისებით სარგებლობისთვის, უმეტეს შემთხვევაში, აუცილებელია საქართველოს მოქალაქეობის დამადასტურებელი დოკუმენტის ქონა, რომელიც ოკუპირებულ ტერიტორიაზე მცხოვრებთა უმეტესობას არ გააჩნია.

სახალხო დამცველი მიესალმება საქართველოს ხელისუფლების, აფხაზეთისა და სამხრეთ ოსეთის დე ფაქტო ხელისუფლებებს შორის მიღწეულ შეთანხმებას პატიმართა გათავისუფლების შესახებ პრონციპით ყველა-ყველაზე, თუმცა განმარტავს, რომ ოკუპირებულ ტერიტორიაზე მცხოვრებ პირთა უფლებების დაცვისა და ინტეგრაციისათვის აუცილებელი გადაწყვეტილების მიღების პროცესი ხშირად მოუქნელი და დროში გაწელილია, რისი მიზეზიც სხვადასხვა სტრუქტურებს შორის შეუთანხმებლობა და ერთიანი პოზიციის არარსებობა.