აბბა ალავერდელ მიტროპოლიტს, მეუფე დავითს ჰგონია, რომ სასულიერო პირის ინფიცირების მიუხედავად, მრევლმა ეკლესიაში სიარული უნდა განაგრძოს. მისი აზრით, 1 სასულიერო პირის ინფიცირების გამო მრევლისთვის რამის აკრძალვა არასწორია.

"ყველამ უნდა დაიცვას ექიმის რჩევისამებრ ის სიფრთხილე, რაც თითოეულ ავადმყოფს ევალება. გაქვს სიცხე, არ უნდა წახვიდე, მაგრამ ეს არ ნიშნავს საყოველთაო გაფიცვას, რომ არ მივიდეთ ან ტაძარში ან სამსახურში. ამას ისეთი გადაჭარბებული მნიშვნელობა არ უნდა მიენიჭოს. მე არ ვიცი რა შეზღუდვა შეიძლება მოჰყვეს ამ ერთ ფაქტს. ის, რომ ახლა ამ ერთი სასულიერო პირის ავადობამ გამოიწვიოს ის, რომ მრევლს ავუკრძალოთ, არ იქნება მართალი", — განუცხადა მან რუსთავი 2-ს .

დღეს, 14 აპრილს კორონავირუსი დაუდასტურდა თბილისში ერთ-ერთ სასულიერო პირს. ის კლინიკაში ოჯახის ორ წევრთან ერთადაა მოთავსებული.

პირველ აპრილს პატრიარქმა ილია მეორემ გაავრცელა მიმართვა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

12 აპრილს ცნობილი გახდა, რომ მართლმადიდებელ ეკლესიებში სააღდგომო ღვთისმსახურებას კომენდანტის საათის დროს ჩაატარებენ.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

ბოლო მონაცემებით, საქართველოში კორონავირუსით ინფიცირებულია 296 ადამიანი, მათგან გამოჯანმრთელებულია 69, ხოლო გარდაცვლილი — 3.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: