აშშ-ის პრეზიდენტი დონალდ ტრამპი აცხადებს, რომ ჯანდაცვის მსოფლიო ორგანიზაციის დაფინანსების საკითხს გადახედავს. ამის შესახებ მან კორონავირუსთან დაკავშირებით გამართულ პრესკონფერენციაზე განაცხადა.

ტრამპის თქმით, ორგანიზაციამ შეცდომები დაუშვა და მათ ადანაშაულებს, რომ კორონავირუსის მიმართ საკმარისად "აგრესიულები" არ იყვნენ.

კიდევ ერთი საკითხი, რამაც ტრამპის უკმაყოფილება გამოიწვია, მისი აზრით, ჯანმრთელობის მსოფლიო ორგანიზაციის მხრიდან ჩინეთისადმი განსაკუთრებულ ყურადღებას გამოჩენაა. ამის მაგალითად ტრამპმა აშშ-ს მიერ ჩინეთთან ავიამიმოსვლის შეწყვეტის გადაწყეტილება მოიყვანა, რომელიც ჯანდაცვის მსოფლიო ორგანიზაციამ გააკრიტიკა.

"მათ ჩემი გადაწყვეტილება გააკრიტიკეს, ჩინეთთან მოგზაურობის შეწყვეტის თაობაზე. ისინი ბევრ რამეში ცდებიან", — განაცხადა ტრამპმა.

ბოლო მონაცემებით, აშშ-ში კორონავირუსით ინფიცირების შემთხვევები 400 ათასს აღწევს. აქედან გარდაცვლილია 12 ათასზე მეტი ადამიანი, გამოჯანმრთელებულია 22 ათასზე მეტი.