საზღვარგარეთიდან საქართველოს მოქალაქეების დასაბრუნებლად საკოორდინაციო საბჭომ ფრენების ახალი განრიგი განსაზღვრა. ესენია:

  • 16 აპრილი — პარიზი-თბილისი;
  • 18 აპრილი — თელ-ავივი-თბილისი;
  • 21 აპრილი — რომი-თბილისი.

ავიარეისებზე ბილეთები გაიყიდება რეისის თარიღამდე 2 დღის ადრე, Georgian Airways-ის ვებგვერდზე. ბილეთის ფასი მთავრობის დადგენილებით არ უნდა აღემატებოდეს 199 ევროს.

საკოორდინაციო საბჭოს მიერ განსაზღვრული რეისებიდან ასევე განხორციელდება:

  • 7 აპრილი — ათენი-თბილისი;
  • 10 აპრილი — ლარნაკა - თბილისი;
  • 12 აპრილი — ბერლინი-თბილისი;
  • 14 აპრილი — ამსტერდამი-თბილისი.

საგარეო საქმეთა სამინისტროს ინფორმაციით, სამშობლოში უკვე დაბრუნდა 5000-მდე პირი. მოქალაქეები დააბრუნეს შემდეგი ქვეყნებიდან: ჩინეთი, იტალია, ირანი, პოლონეთი,ბულგარეთი,გერმანია, საბერძნეთი, ბელარუსი, ნიდერლანდები, ეგვიპტე, აზერბაიჯანი, სომხეთი.

მოქალაქეების ქვეყანაში დასაბრუნებლად დახმარების სურვილი გამოთქვა ნაციონალურმა მოძრაობამაც, რაზეც ხელისუფლებამ უარი თქვა. ნაციონალური მოძრაობის თავმჯდომარის გრიგოლ ვაშაძის განცხადებით, ისევ ძალაშია შეთავაზება უკრაინული კომპანია Sky up-ით საქართველოს მოქალაქეები უფასოდ დააბრუნონ: 6 აპრილს ბარსელონადან, 7 აპრილს ბერლინიდან, 8 აპრილს ვარშავიდან და ბერლინიდან, 9 აპრილს კი რომიდან. მისივე თქმით, ხელისუფლების მითითების შემთხვევაში ავიაკომპანია მზად არის ეს გრაფიკი და მიმართულებები შეცვალოს.

გიორგი გახარიამ აღნიშნა, რომ ევროპის სხვადასხვა ქალაქიდან საქართველოს მოქალაქეების ჩამოყვანაში ქვეყანას დახმარება არ სჭირდება და თუ ვინმეს შესაძლებლობა აქვს, ფული ფონდში ჩარიცხოს. მისი თქმით, ამ თემაზე რამდენიმე კვირაა მხოლოდ ჭორაობენ.

ექსპრეზიდენტი მიხეილ სააკაშვილი გახარიას პასუხად აცხადებს, რომ ფონდში ფული შეუძლია "ბუნკერში ჩამალულმა უფროსმა" ბიძინა ივანიშვილმა გადაურიცხოს. სააკაშვილის თქმით, მთავრობისგან მხოლოდ 2 რამეს ითხოვენ, რომ მიმართონ საელჩოებს წერილით, რათა გაიხსნას აეროპორტები და შემდეგ ამ რეისმა თბილისში დაჯდომა მოახერხოს.