თბილისის ზოგიერთ საბავშვო ბაღში ბავშვები იმიტირებულ ქორწილის ცერემონიაში იღებენ მონაწილეობას. ვიდეოები ზიარდებოდა კონკრეტული ბაღის ღია ჯგუფში, გარდა ვიდეოებისა, მასწავლებელი დებდა ბავშვების ფოტოებს და ასათაურებდა: წყვილი #1, #2, #3 და ა.შ. ერთ-ერთი ბავშვის ოჯახის წევრი წერს ფეისბუკზე:

"ხვალ, ჩემ ბიძაშვილის შვილს, რომელიც ოთხი წლის არის, ქორწილი აქვს. დიახ ქორწილი. საბავშვო ბაღის მასწავლებელმა, არგუმენტად გვაჩვენა პროგრამა ბაღის აღსაზრდელებისთვის, სადაც არის ასეთი პუნქტი: "ოჯახი და ტრადიციები" ქვეპუნქტი: "ქორწილი". ამ ქვეპუნქტის მიხედვით, ბიჭებმა უნდა აირჩიონ გოგონები, რომელზეც სურთ დაქორწინება. მშობლებს დაავალეს მიიტანონ ტკბილეული. გოგონებს ჩააცვან კაბები, ფაქტებს თვითონ საბავშვო ბაღი უზრუნველყოფს."

პროგრამა ნამდვილად არსებობს და მასში ნამდვილად არის საუბარი ქორწილზე:

ამ საკითხთან დაკავშირებით On.ge ესაუბრა ბავშვთა ფსიქოლოგს. მაია ცირამუა ბავშვის განვითარების პროცესში, ქორწილის რიტუალის გაცნობის საჭიროებას ვერ ხედავს:

ჩვენ კი არ უნდა ვიყოთ ბედნიერები ბავშვებით, ბავშვები უნდა იყვნენ ბედნიერები თვითონ.

მაია ცირამუა

"ერთი საკითხია, რაში სჭირდება ბავშვის განვითარებას ქორწილის რიტუალის გაცნობა, მეორე საკითხი კი ინტერპრეტაციაა, ანუ ვინ როგორ გაიგო და გააკეთა ამ ყველაფრის ინტერპრეტაცია, რაც პროგრამაში წერია."

ცირამუა მიიჩნევს, რომ მსგავსი აქტივობები, თუ ისინი არ არის ბავშვთა ინიციატივიდან გამომდინარე, შესაძლოა ძალადობის ელემენტებს შეიცავდეს:

მგონია, რომ ამ ასაკის ბავშვებს სხვა რაღაცები აინტერესებთ და სწორედ ამ სხვა რაღაცებით უნდა იყოს სკოლამდელი აღზრდის სისტემა დაკავებული.

მაია ცირამუა

"ზოგადად არ ვამართლებ, რომ ხდებოდეს ბავშვების საშუალებით სანახაობების მოწყობა. იქ სადაც ბავშვის ინტერესი და ჩართულობა არ არის მის პირად ინიციატივაზე ორიენტირებული. არ ვარ მომხრე ბავშვების დიდი ადამიანის როლში შეყვანის, მითუმეტეს, როდესაც ეს არის საქორწილო რიტუალი. მგონია, რომ ძალიან სერიოზული ძალადობაა ეს ბავშვის ფსიქიკაზე. აბსოლუტურად უცხოა ბავშვისთვის ეს ასაკი, რომელშიც ის შეჰყავთ, უცხოა მისთვის ეს როლი, ვისთვის კეთდება აბსოლუტურად გაუგებარია. ფაქტია, რომ კეთდება სანახაობისთვის, რომ სიამოვნება მიიღონ მშობლებმა, მასწავლებლებმა, თუმცა ეს არ არის ბავშვის ინტერესებზე მორგებული."

On.ge დაუკავშირდა გაეროს ბავშვთა ფონდის (Unicef) წარმომადგენელსაც. მაია ქურციკიძე ამბობს, რომ ეს არის სახელმძღვანელო წესები და მათი დეტალურად გადმოღება სავალდებულო არ არის. მისივე თქმით, საჭიროა შემოქმედებითი მიდგომა და ბავშვების ინტერესების გათვალისწინებით ჯგუფური აქტივობების დაგეგმვა:

"სკოლამდელ დაწესებულებებში ჯგუფური აქტივობები და თამაშები უნდა გამომდინარეობდეს ბავშვების ინტერესებიდან. უნდა იყოს ის რაც ამ ბავშვებს აინტერესებთ, გამომდინარეობდეს მათი საჭიროებებიდან და შესაძლებლობებიდან. იქ არ უნდა იყოს ისეთი თამაშები და აქტივობები, რომლებსაც მხოლოდ ზრდასრულები წარმართავენ მთლიანად და ბავშვები პასიურად და უინტერესოდ მონაწილეობენ და ასრულებენ მხოლოდ მასწავლებლის რაღაც მითითებებს."

მაია ქურციკიძე მიიჩნევს, რომ მთავარი სისტემური ხარვეზი მასწავლებლების დაბალი კვალიფიკაციაა:

მნიშვნელოვანია, რომ ბაღებში მუშაობდნენ შესაბამისი კვალიფიკაციის ადამიანები.

მაია ქურციკიძე

"მთავარი ჩვენთვის არის ფორმა, როგორ განახორციელებ ამ ჯგუფურ თამაშებს. მთავარი არის, რომ ბავშვებისგან მოდიოდეს ეს ინტერესი, რომ თვითონ მონაწილეობდნენ და მასწავლებელმა რომ შეძლოს ეს, რომ სწორედ ბავშვის ინტერესებზე მორგებული განვითარების შესაბამისი პროგრამები დანერგოს. ამისათვის საჭიროა ისინი ფლობდნენ შესაბამის უნარებს და ცოდნას. ამიტომაც მნიშვნელოვანია, რომ ბაღებში მუშაობდნენ შესაბამისი კვალიფიკაციის ადამიანები."