დეკანოზი ალექსანდრე გალდავა ამბობს, რომ ეკლესიამ ყველა ის რეკომენდაცია უნდა გაითვალისწინოს, რასაც ჯანდაცვის სამინისტრო კორონავირუსთან დაკავშირებით გასცემს. ცვლილება არ უნდა შეეხოს მხოლოდ ზიარების წესს. TV პირველის ეთერში ალექსანდრე გალდავამ განმარტა, რომ ზიარების წესი სხვადასხვა ეპოქაში სხვადასხვა იყო, მაგრამ არა იმიტომ, რომ ვირუსის ეშინოდათ.

"ყველაფერი უნდა გააკეთოს და აკეთებს კიდევაც ეკლესია, რომ რა რეკომენდაციასაც მოგვცემენ ჯანდაცვის სამინისტროდან, ეს იქნება დეზინფექცია, თავშეკავება, პრევენციები, ერთად არდგომა, ხატებზე თუ ერთმანეთზე ამბორი, ასე შემდეგ. ყველაფერი ზიარების გარდა, იმიტომ, რომ ადამიანი რომ კვდება, მაშინ ვაზიარებთ, როცა სჭირდება მას განკურნება. როგორ შეიძლება, იმით, რითაც კურნავ, რომ პირიქით დაგაზიანოს, ამაზეა ლაპარაკი დანარჩენი ყველაფერი უნდა გავაკეთოთ", — თქვა ალექსანდრე გალდავამ.

დაავადებათა კონტროლის ეროვნულ ცენტრში ამბობენ, რომ მოსახლეობას აძლევენ რეკომენდაციას არ გამოიყენონ ერთი კოვზი, მაგრამ ისინი რელიგიურ რიტუალებს ვერ შეცვლიან. ზიარების დროს ერთჯერადი კოვზების გამოყენებას რეკომენდაციას გაუწევდა თბილისის ინფექციური საავადმყოფოს დირექტორი თენგიზ ცერცვაძეც. თუმცა, ისიც აღნიშნავს, რომ რელიგიის კომპეტენციაში ვერ ჩაერევა.

29 თებერვალს ცნობილი გახდა, რომ საქართველოს საპატრიარქო საერთო კოვზიდან ზიარების წესის შეცვლას არ აპირებს და კორონავირუსთან დაკავშირებით გავრცელებულ განცხადებაში წერს, რომ სიცოცხლისთვის საშიში ინფექცია აქამდეც არაერთხელ გავრცელებულა. მათი თქმით, ზიარებისთვის ერთი კოვზის გამოყენების პრაქტიკა ათასწლოვან ისტორიას ითვლის, "მორწმუნეები კი ამას არ უშინდებოდნენ".

დაავადებათა კონტროლის ეროვნული ცენტრის დირექტორმა, ამირან გამყრელიძემ ცოტა ხნის წინ ბრიფინგზე აღნიშნა, რომ საპატრიარქოს სადეზინფექციო საშუალებების ქველმოქმედების ნიშნად გადაცემა შესთავაზეს. ისინი საპატრიარქოდან პასუხს ელოდებიან.

ამ ეტაპზე საქართველოში კორონავირუსით ინფიცირების 15 შემთხვევაა დადასტურებული. პირველი 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს საღამოს, 7 მარტს კორონავირუსით ინფიცირების კიდევ 4 შემთხვევა დადასტურდა, 9 მარტს კი კორონავირუსი 2 პაციენტს დაუდასტურდა.

ასევე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: