ამერიკის შეერთებული შტატების პრეზიდენტი დონალდ ტრამპი 9 მაისს მოსკოვში არ ჩავა. ამის შესახებ ინფორმაციას რუსული მედია რუსეთის პრეზიდენტის პრესსპიკერზე, დიმიტრი პესკოვზე დაყრდნობით ავრცელებს.

TV Rain-ის ინფორმაციით, პესკოვმა განაცხადა, რომ ინფორმაცია დიპლომატიური არხებიდან მიიღეს. როგორც კომერსანტი წერს, ამერიკული მხარე დაპირდა რუსეთს, რომ მათი წარმომადგენელი მეორე მსოფლიო ომში გამარჯვების 75-ე წლისთავს აუცილებლად დაესწრება. თუმცა, პესკოვის თქმით, უცნობია, ვინ იქნება ეს ადამიანი.

Tass-თან ინტერვიუში პუტინმა განაცხადა, რომ მისთვის სულერთია, ჩავლენ თუ არა ამ ღონისძიებაზე სხვა ლიდერები, რადგან ეს მათი დღესასწაულია.

პუტინს ღონისძიებაზე ყავს მიწვეული უკრაინის პრეზიდენტი ვოლოდიმირ ზელენსკიც, მიუხედვად იმისა, რომ მისი ქვეყნის ნაწილი აქვს ანექსირებული. გარდა ამისა, მან მიიწვია საქართველოს ოკუპირებული რეგიონის, აფხაზეთის ყოფილი დე ფაქტო პრეზიდენტი რაულ ხაჯიმბა, რომელიც იმ დროს ჯერ კიდევ პოსტზე იყო.

თავად პუტინი მეორე მსოფლიო ომის დაწყების 80 წლისთავზე ვარშავაში არ მიიწვიეს. პოლონეთის მთავრობამ მიიჩნია, რომ ეს შეუსაბამო იქნებოდა.

9 მაისის აღნიშვნა ყოველთვის სადავო საკითხი იყო. საზოგადოება ვერ თანხმდება ეს დღე მართლა ფაშიზმზე გამარჯვების აღსანიშნად დაინიშნა, თუ საბჭოთა კავშირის მორიგი ახირებაა. ევროპის ქვეყნების ნაწილი ფაშიზმის დამარცხებას 8 მაისს აღნიშნავს, ვინაიდან სწორედ 1945 წლის 8 მაისს გამოაცხადა ფაშისტურმა გერმანიამ კაპიტულაცია. 9 მაისს კი საბჭოთა კავშირში, წითელ მოედანზე სამხედრო აღლუმი გაიმართა გამარჯვების აღსანიშნავად და იმის შემდეგ "გამარჯვების დღე" 9 მაისს აღინიშნება.