პოლონეთის მთავრობას მიაჩნია, რომ მეორე მსოფლიო ომის დაწყების 80 წლისთავზე რუსეთის პრეზიდენტის, ვლადიმერ პუტინის ყოფნა შეუსაბამოა. ღონისძიება ვარშავაში სექტემბერში გაიმართება.

"მიმაჩნია, რომ პოლონეთზე შეიარაღებული აგრესიის დაწყების წლისთავის აღნიშვნა შეუსაბამო იქნება იმ ლიდერის მონაწილეობით, რომელიც თავის მეზობლებს იმავე მეთოდებით ექცევა", — განაცხადა ქვეყნის პრემიერ-მინისტრის მოადგილე აიცეკ სასინმა. ამის შესახებ მან პოლონურ რადიოსადგურთან, Polskie Radio 24-თან ისაუბრა.

ამავე დროს, სასინმა აღნიშნა, რომ ღონისძიებას შესაძლოა, აშშ-ს პრეზიდენტი, დონალდ ტრამპი დაესწროს. გარდა ამისა, მან არ გამორიცხა გერმანიის კანცლერის, ანგელა მერკელის ვიზიტი.

ის, რომ პოლონეთი ღონისძიებაზე რუსეთს არ დაპატიჟებს ჯერ კიდევ მარტში გახდა ცნობილი. პრეზიდენტის კანცელარიაში განაცხადეს, რომ მოსაწვევებს მიიღებენ მხოლოდ ევროკავშირის პარტნიორები და აღმოსავლეთის პარტნიორობის პროგრამის წევრები.