რუსეთის პრეზიდენტი, ვლადიმერ პუტინი უკრაინის პრეზიდენტს, ვოლოდიმირ ზელენსკის მეორე მსოფლიო ომში გამარჯვების 75 წლისთავის აღსანიშნავ ღონისძიებაზე ეპატიჟება. ღონსიძიება 2020 წლის 9 მაისს გაიმართება. როგორც პუტინის თანაშემწემ, იური უშაკოვმა განაცხადა, მოსაწვევს ზელენსკი უახლოეს დღეებში მიიღებს.

უშაკოვმა, ასევე, აღნიშნა, რომ 17 ქვეყნის ლიდერი ღონისძიებაში მონაწილეობას უკვე დათანხმდა, მათ შორის არიან ინდოეთის, კუბის, საფრანგეთის, ჩეხეთის, ვენესუელის, ბელარუსის, სომხეთის, ბულგარეთისა და სერბეთის ლიდერები.

რუსეთის პრეზიდენტმა 9 მაისის ღონისძიებაზე აშშ-ს პრეზიდენტი დონალდ ტრამპი 16 აგვისტოს დაპატიჟა. ტრამპმა მაშინ განაცხადა, რომ ამაზე სერიოზულად დაფიქრდება, თუმცა უშაკოვის თქმით, ტრამპისგან ოფიციალური პასუხი ჯერ არ მიუღიათ.

მეორე მსოფლიო ომში გამარჯვების 70 წლისთავზე, 2015 წელს რუსეთში გერმანიის, საფრანგეთის, დიდი ბრიტანეთისა და აშშ-ს ლიდერები არ ჩავიდნენ. მათი თქმით, უკრაინაში მიმდინარე მოვლენების გამო რუსეთში ჩასვლა შეუსაბამო იქნებოდა.

პირველ სექტემბერს პოლონეთში მეორე მსოფლიო ომის დაწყების 80 წლისთავს აღნიშნავენ. ვარშავაში ღონისძიებას ევროპის არაერთი ქვეყნის ლიდერი დაესწრება. ასევე, ღონისძიებაში მონაწილეობას მიიღებს საქართველოს პრეზიდენტი, სალომე ზურაბიშვილი. ღონისძიებაზე არ დაპატიჟეს ვლადიმერ პუტინი.

ვარშავაში პირველ სექტემბერს უნდა ჩასულიყო დონალდ ტრამპიც, თუმცა ფლორიდაში გამანადგურებელი ქარიშხლის მოახლოების გამო პრეზიდენტმა ვიზიტი გააუქმა.