ისრაელელმა მკვლევრებმა ფილტვის კიბოს დიაგნოსტიკისთვის მარტივი და სწრაფი, 60 დოლარის ღირებულების სისხლის ანალიზი შეიმუშავეს, რომლის გამოყენების შემთხვევაში ძვირადღირებული დნმ-ის გენეტიკური თანმიმდევრობის განსაზღვრა საჭირო აღარ არის. ინფორმაციას The Times of Israel ავრცელებს.

103 მონაწილესთან ჩატარებულ, რეცენზირებად კვლევაში ტესტმა ფილტვის კიბოს მე-2-მე-4 სტადიების შემთხვევების 93% ზუსტად გამოავლინა, ხოლო ჯანმრთელი საკონტროლო ჯგუფის 90%-ში კიბოს არსებობა გამორიცხა. მეცნიერებმა სისხლში მოცირკულირე დნმ-ის ფრაგმენტებზე არსებული ქიმიური შაბლონები ფლუორესცენტული სინათლის გამოყენებით გააანალიზეს.

კვლევას თელ-ავივის უნივერსიტეტის ქიმიის სკოლის მეცნიერები ხელმძღვანელობდნენ, JaxBio Technologies-თან, ასევე ჰაიფის ბნეი-ციონის სამედიცინო ცენტრისა და თელ-ავივთან ახლოს მდებარე შებას სამედიცინო ცენტრის ექიმებთან თანამშრომლობით.

"ფილტვის კიბო ერთ-ერთი ყველაზე ლეტალური და ამავდროულად ერთ-ერთი ყველაზე გავრცელებული კიბოა", — განაცხადა ბნეი-ციონის სამედიცინო ცენტრის ონკოლოგიური განყოფილების დირექტორმა, კვლევის მთავარმა ავტორმა და მთავარმა კლინიკურმა მკვლევარმა, დოქტორმა აბედ აგბარიამ.

The Times of Israel-თან მან აღნიშნა: "ადამიანების უმეტესობა დაავადების ბოლო სტადიებზე მოდის. თუ დაავადების ადრეულ ეტაპზე აღმოჩენას შევძლებთ, შესაძლებელი იქნება ქირურგიული ჩარევა და სრული განკურნება. ხუთწლიანი გადარჩენის მაჩვენებელიც გაცილებით უკეთესი იქნება".

კვლევა რეცენზირებად სამეცნიერო ჟურნალში Nature Precision Oncology გამოქვეყნდა.