აშშ-ის პრეზიდენტის სპეციალურ წარმომადგენლები სტივ უიტკოფი და ჯარედ კუშნერი კიევში 6 სექტემბერს პოლონეთიდან ჩავიდნენ. როგორც DW წერს, ორივესთვის ეს უკრაინაში პირველი ვიზიტია მას შემდეგ, რაც ისინი ომის მშვიდობიანი გზით დასრულებაზე მუშაობენ. უკრაინის დედაქალაქში გამართულ მოლაპარაკებებში ასევე მონაწილეობდნენ: გერმანიის, საფრანგეთისა და დიდი ბრიტანეთის ეროვნული უსაფრთხოების საკითხებში მრჩევლები და უკრაინის პრეზიდენტი ვოლოდიმირ ზელენსკი. მისი თქმით, შეხვედრაზე რუსეთ-უკრაინის ომის დასრულების შესაძლო პირობები, უკრაინის დასავლელი პარტნიორების მოკლევადიანი მხარდაჭერა და უსაფრთხოების გარანტიები განიხილეს.

ზელენსკის განცხადებით, ომი ზამთარშიც გაგრძელდება, ამიტომ უკრაინას დასავლელი პარტნიორებისგან ზამთრისთვის დახმარების პაკეტი სჭირდება.

"ძალიან ვიმედოვნებთ, რომ ამერიკელ პარტნიორებთან შეთანხმებას შევძლებთ და იმედი გვაქვს ევროპელი პარტნიორების მხარდაჭერისაც, თუ ომი ზამთარშიც გაგრძელდება. ამ ეტაპზე სწორედ ასე გამოიყურება ვითარება", — განაცხადა მან.

მისი თქმით, უკრაინა ასევე ელოდება ამერიკული თხევადი ბუნებრივი აირის (LNG) დიდი მოცულობით მიწოდებას და საჰაერო თავდაცვის სისტემების ახალ პარტიებს.

მანამდე ამერიკული გამოცემა Axios-ი, მოლაპარაკებების მიმდინარეობის შესახებ ინფორმირებულ წყაროზე დაყრდნობით, წერდა, რომ ზელენსკიმ უიტკოფთან და კუშნერთან შეხვედრაზე ომის პირობებში უკრაინის ზამთრისთვის მომზადების საკითხი დააყენა. აშშ-ის წარმომადგენლებმა კი აღნიშნეს, რომ სურთ, სამშვიდობო მოლაპარაკებებში გარღვევა ზამთრის დადგომამდე მოხდეს.

Axios-ის კიდევ ერთი, ანონიმური წყაროს ცნობით, კიევში გამართული მოლაპარაკებები კარგად წარიმართა. მისი თქმით, კუშნერსა და უიტკოფს სურთ, დაინტერესებულ მხარეებთან ერთად სამშვიდობო წინადადებების განახლებულ ვერსიაზე იმუშაონ.

როგორც DW წერს, მოლაპარაკებების ერთ-ერთი თემა ტერიტორიული საკითხიც იყო.

"ტერიტორიული საკითხი კვლავ აქტუალურია... ეს არ ნიშნავს, რომ ამაზე ძალიან დიდხანს ვისაუბრეთ, თუმცა მისი განხილვის შესაძლებლობა გვქონდა. კვლავ იმავე აზრზე ვრჩები, რომ ასეთი რთული საკითხები მხოლოდ ლიდერების დონეზე უნდა გადაწყდეს"“, — განაცხადა ზელენსკიმ.

რა განცხადებები გაკეთდა?

მოლაპარაკებების პირველი რაუნდის შემდეგ ჯარედ კუშნერმა ჟურნალისტებს განუცხადა, რომ აშშ-ის პრეზიდენტი დონალდ ტრამპი აცნობიერებს, რომ უკრაინაში მშვიდობის დამყარება "ძალიან რთული და კომპლექსური საკითხია", თუმცა მტკიცედ აქვს გადაწყვეტილი ომის დასრულება, ადამიანების დაღუპვის შეჩერება და ოჯახებისთვის შვების მოტანა.

ერთი დღით ადრე უიტკოფმა და კუშნერმა მოსკოვში რუსეთის პრეზიდენტ ვლადიმირ პუტინთან გამართეს მოლაპარაკებები. თეთრმა სახლმა შეხვედრას "შინაარსიანი" უწოდა, კრემლის განცხადებით კი, უკრაინაში ომის დასრულების საკითხზე ვითარება რთულია. აშშ-ის ეს წარმომადგენლები მოსკოვში მანამდეც რამდენჯერმე იმყოფებოდნენ.