გერმანიის საქსონია-ანჰალტის მიწის პარლამენტის არჩევნების წინასწარმა შედეგებმა ულტრამემარჯვენე პარტია ალტერნატივა გერმანიისთვის (AfD)-ის გამარჯვება დაადასტურა, თუმცა პარტიამ აბსოლუტური უმრავლესობა ვერ მოიპოვა.

Spiegel-ის მონაცემებით, წინასწარი შედეგებით, საქსონია-ანჰალტის არჩევნებში AfD-მ 43.8% მიიღო. 2021 წელთან შედარებით პარტიამ შედეგი თითქმის გააორმაგა, თუმცა ეს საკმარისი არ აღმოჩნდა ლანდტაგში აბსოლუტური უმრავლესობის მოსაპოვებლად. საღამოს პროგნოზით, AfD-ს 44.5%-ს უწინასწარმეტყველებდნენ.

ფოტო: Spiegel

ამ დროისთვის მმართველ ქრისტიან-დემოკრატიულ კავშირს (CDU) 17.2% აქვს, სოციალ-დემოკრატიულ პარტიას (SPD) — 9.3%, მწვანეებს — 8.9%, ხოლო მემარცხენეებს — 8.6%. სარა ვაგენკნეხტის მემარცხენე-პოპულისტურმა პარტიამ BSW-მ 5.3% მიიღო და საარჩევნო ბარიერი გადალახა.

საარჩევნო კომისიის მონაცემებით, AfD 83-წევრიან ლანდტაგში (გერმანიის თითოეული ფედერალური მიწის რეგიონული პარლამენტი) 39 მანდატს მიიღებს, მაშინ როცა აბსოლუტური უმრავლესობისთვის 42 მანდატია საჭირო.

CDU-ს 15 მანდატი ექნება, მაშინ როცა 2021 წლის არჩევნების შემდეგ 40 ჰქონდა. SPD და მწვანეები კვლავ 8-8 მანდატს მიიღებენ, მემარცხენეები — 8-ს, 12-ის ნაცვლად, ხოლო BSW — 5 მანდატს.

AfD მიგრაციის პოლიტიკის გამკაცრებას და განათლების სისტემის მნიშვნელოვან ცვლილებას გეგმავს. პარტიის გეგმით, თავშესაფრის მაძიებლებსა და ლტოლვილებს მუშაობა დაევალებათ, ასევე გაიზრდება ქვეყანაში არალეგალურად მყოფი პირების დეპორტაციის მასშტაბი.

განათლების სფეროში AfD სასკოლო განათლების სავალდებულოობის გაუქმებას და მშობლებისთვის შვილების სახლში სწავლების შესაძლებლობის დაშვებას გეგმავს.