7 სექტემბერს, დიუშენის შესახებ ცნობიერების ამაღლების საერთაშორისო დღეს, საჯარო ღონისძიება გაიმართება, სადაც მონაწილეობას მიიღებენ დიუშენით დაავადებული ბავშვები, მშობლები, ექიმები, სხვადასხვა უწყებების წარმომადგენლები და მხარდამჭერები. ინფორმაციას ორგანიზაცია "ერთად ვებრძოლოთ დიუშენის კუნთოვან დისტროფიას" ავრცელებს. მათი ცნობით, შეხვედრა 18:00 საათზე, თბილისში სასტუმრო პანორამა ლისი გრანდ ოტელში ჩატარდება.

"დიუშენის მშობლების უწყვეტი მრავალთვიანი ბრძოლის შედეგად ხელისუფლების მიერ მიღებული იქნა გადაწყვეტილება ქვეყანაში დიუშენის სამკურნალო ორი ინოვაციური მედიკამენტის შემოტანის თაობაზე. აქედან ერთი უკვე რამდენიმე დღეში შემოვა საქართველოში, ხოლო მეორესთან დაკავშირებით შეთანხმება ძირითად ასპექტებზე მიღწეულია და შესაბამის ხელშეკრულებას ხელი მალე მოეწერება.

შეიქმნა დიუშენის მართვის პროგრამა და დიუშენის პაციენტებს ყოველ 6 თვეში ერთხელ უტარდებათ მრავალპროფილიანი გამოკვლევები მულტიდისციპლინური გუნდის მონაწილეობით.

საზოგადოების, განსაკუთრებით სტუდენტების უპრეცედენტო მხარდაჭერით დიუშენით დაავადებული ბავშვების დასახმარებლად შეგროვდა 2 400 000 ლარზე მეტი, რაც იხარჯება პაციენტთა იმ საჭიროებების დაკმაყოფილებაზე რასაც სახელმწიფო პროგრამა არ აფინანსებს. დიუშენის 80 ზე მეტ პაციენტს დაურიგდა ერთჯერადი ფულადი დახმარება 3000, 5000 და 10 000 ლარი.

თბილისის მერიასთან მიღწეული იქნა შეთანხმება დიუშენის ცენტრის ასაშენებლად ფართის გამოყოფის თაობაზე. დიუშენის ცენტრი აშენდება მეტრო ახმეტელის მიმდებარე ტერიტორიაზე და ის იქნება სარეაბილიტაციო ღონისძიებების, ტრენინგების, კონფერენციების და შეხვედრების ადგილი", — წერია ორგანიზაციის მიერ გავრცელებულ ინფორმაციაში.