რუსეთის პრეზიდენტმა, ვლადიმერ პუტინმა დე ფაქტო აფხეზეთის ე.წ. პრეზიდენტი, რაულ ხაჯიმბა მეორე მსოფლიო ომში გამარჯვების 75 წლისთავის აღსანიშნავ ღონისძიებაზე მიიწვია. ამის შესახებ ინფორმაციას ადგილობრივი გამოცემა ავრცელებს.

წერილში, რომელიც რუსეთს პრეზიდენტმა ხაჯიმბას გაუგზავნა, პუტინი აფხაზებს მადლობას უხდის.

"რუსეთი არასდროს დაივიწყებს იმ უზარმაზარ მსხვერპლს, რაც მოძმე აფხაზებმა მეორე მსოფლიო ომში გამარჯვებისთვის გაიღეს", — წერს პუტინი.

ღონისძიება 2020 წლის 9 მაისს გაიმართება. მასზე პუტინმა აშშ-ს პრეზიდენტი, დონალდ ტრამპი და უკრაინის პრეზიდენტი, ვოლოდიმირ ზელენსკი მიიწვია. ღონისძიებას დაესწრება საფრანგეთის პრეზიდენტი, ემანუელ მაკრონი.

მეორე მსოფლიო ომში გამარჯვების 70 წლისთავზე, 2015 წელს რუსეთში გერმანიის, საფრანგეთის, დიდი ბრიტანეთისა და აშშ-ს ლიდერები არ ჩავიდნენ. მათი თქმით, უკრაინაში მიმდინარე მოვლენების გამო რუსეთში ჩასვლა შეუსაბამო იქნებოდა.

პირველ სექტემბერს პოლონეთში მეორე მსოფლიო ომის დაწყების 80 წლისთავი აღნიშნა. ვარშავაში ღონისძიებას ევროპის არაერთი ქვეყნის ლიდერი დაესწრო. ასევე, ღონისძიებაში მონაწილეობას მიიღებო საქართველოს პრეზიდენტმა, სალომე ზურაბიშვილმა. ღონისძიებაზე არ დაპატიჟეს ვლადიმერ პუტინი.

ვარშავაში პირველ სექტემბერს უნდა ჩასულიყო დონალდ ტრამპიც, თუმცა ფლორიდაში გამანადგურებელი ქარიშხლის მოახლოების გამო პრეზიდენტმა ვიზიტი გააუქმა.