4-დღიანი ძებნის შემდეგ, ბათუმის ზღვაში ქალის ცხედარი იპოვეს — გარდაცვლილი აქტივისტი კესო დეკანოსიძეა — ინფორმაცია NEWS.On.ge-ს გარდაცვლილის მეგობარმა დაუდასტურა. თვითმხილველების თქმით, იგი 29 აგვისტოს, საღამოს 11 საათისკენ, ბათუმის ძველი ბულვარის მიმდებარედ შევიდა ზღვაში და გაუჩინარდა.

დეკანოსიძე საპროტესტო აქციებში აქტიურად მონაწილეობდა და მიმდინარე წლის 30 მარტს, ბიძინა ივანიშვილის გასამართლების მოთხოვნით, პარლამენტთან შიმშილობაც დაიწყო. გარდაცვალებამდე ცოტა ხნით ადრე კი სოციალურ ქსელში გამოაქვეყნა ვიდეოები, სადაც დედაზე, მანანა ოდიკაძეზე და მათ შორის არსებულ პოლიტიკურ უთანხმოებაზე საუბრობდა.

აქტივისტის მონათხრობის თანახმად, დედამისი წინა მთავრობის დროს ჯანმრთელობის ყალბი ცნობების (ფსიქო) გაცემისთვის დააკავეს. დეკანოსიძე ვიდეოში ამბობდა, რომ ქართული ოცნების მმართველობის პერიოდში ქალი კვლავ დაუბრუნდა უკანონო საქმიანობას და ხელისუფლების მხარდაჭერის სანაცვლოდ ფინანსურ სარგებელს იღებდა. გარდა ამისა, აქტივისტი ამტკიცებდა, რომ განსხვავებული პოლიტიკური შეხედულებების გამო დედამისმა მას სამართლებრივი პრობლემები შეუქმნა და მისი გაჩუმება სურდა.

აღსანიშნავია, რომ კესო დეკანოსიძის გარდაცვალების შემდეგ აღნიშნული ვიდეოები მისი სოციალური ქსელის გვერდიდან წაიშალა.